Јас сум задоволен поради тоа што средбата предизвика реакција, затоа што средби што не предизвикуваат реакции можеме да констатираме дека биле без цел, вели премиерот на техничката влада, Оливер Спасовски, за средбата во понеделникот во Истанбул со вселенскиот патријарх Вартоломеј, на која присуствуваа и експремиерот Зоран Заев и директорот на Комисијата за односи со верските заедници и религиозни групи, Даријан Сотировски.
Спасовски во интервју за државната новинска агенција МИА вели дека самиот факт дека делегацијата била во Инстанбул на повик од вселенскиот патријарх доволно говори дека станува збор за една значајна средба и посочува дека тие го поддржуваат патријархот да продолжи да го поттикнува дијалогот за решавање на прашањата помеѓу православните цркви и верниците.
„Секако дека за нас е многу значајно да се најде решение за МПЦ. Тоа не се одлуки коишто ги донесува Владата или државата. Ние само кажавме дека даваме силна поддршка на МПЦ, дека постои едно силно единство за да се изнајде решение. Ние таа работа ќе ја оставиме на црквата да ја решава како прашање. Меѓутоа посакуваме да се најде навистина решение. И овде кога станува збор за врвни и национални приоритети, не смее да станува збор за политика“,
потенцира премиерот.
Тој вели дека ова прашање многу пати во поновата историја не добило поддршка за решавање од поедини политички субјекти.
„И најмалку што може да не се одмага во процесот, туку да дозволиме слободно врз основа на разговорите коишто ќе се водат помеѓу црквите да дојдеме и до решение на ова прашање. Меѓутоа реков тоа ќе е работа на МПЦ заедно со Вселенската патријаршија преку разговор да дојде до решение. Наше е само да дадеме поддршка за целиот тој процес и да бидеме благодарни ако час поскоро дојдеме до решение“,
вели Спасовски.
„360 степени“ пред неколку денови пишуваше дека Македонската православна црква би можела да се надева на признавање на автокефалноста и излегување од состојбата на раскол со останатите православни цркви под еклисиолошкото име Охридска архиепископија.
Во таков дух беше напишано соопштението од Вселенската патријаршија по средбата на патријархот Вартоломеј со Спасовски и Заев.
Според доброупатен извор, средбата меѓу претставници на СПЦ и МПЦ-ОА во седиштето на Вселенската патријаршија во Истанбул би требало да се очекува кон крајот на февруари. Ако овој состанок помине во посакуваната атмосфера, вселенскиот патријарх Вартоломеј е подготвен напролет да испрати свој емисар на сослужување со македонските владици во Охрид, што би бил гест на практично признавање на МПЦ-ОА. Формалното признавање на автокефалноста со врачување томос од патријархот Вартоломеј, во најдобар случај, би дошло до крајот на 2020 година.
*Поврзани вести:
МПЦ-ОА пред признавање на автокефалноста под еклисиолошкото име Охридска архиепископија
Московска патријаршија: Се планира признавање на МПЦ, Вартоломеј ќе ѝ забие нож во грб на СПЦ