„Во услови кога современиот свет се соочува со оваа сериозна хуманитарна криза, неопходни се заеднички мерки и градење капацитети. Северна Македонија е одлучна да придонесе за заеднички пристап во соработката со нашите НАТО партнери, и со институциите и агенциите на Европската Унија, во справувањето со заканите од короната. Нема да дозволиме да бидат доведени во прашање вредностите на НАТО пред ниту една закана“, порача премиерот Оливер Спасовски во обраќањето на видеоконференцијата „Глобалните закани и ризици и македонското членство во НАТО“, која по повод 4 Април, Денот на НАТО, го организираа Амбасадата на САД во земјава и Факултетот за безбедност.
Тој потсети дека пред точно 7 дена нашата земја и формално стана 30. членка на НАТО, со што стана и дел од глобалните процеси кои нè ставаат во редот на сојузниците со кои заеднички ќе се справуваме со сите конвенционални и хибридни закани за сигурноста, безбедноста, и за мирот.
„Заедно ќе направиме сè што треба за да го вратиме безбедното секојдневие на граѓаните од нашата земја, и да учествуваме во тоа за граѓаните од регионот и од Европа. Ќе ја вратиме состојбата на просперитетни, безбедни, мирни и слободни општества. Тоа се вредности на земјите членки на НАТО и на Европската Унија“,
истакна Спасовски.
Во однос на регионот, рече дека нашата земја како дел од безбедносен штит на најмоќниот воен сојуз во светот е фактор за стабилност, извозник на безбедност, земја во која граѓаните и децата имаат сигурна иднина.
„Со зачленување во НАТО и со отворените преговори за членство во ЕУ, по принципот на ‘еднаков меѓу еднаквите’ и принципот на солидарност ‘сите за еден – еден за сите’, се стекнавме со можност за влијание и еднакво право во носење на одлуките во оваа организации“,
истакнува Спасовски.
Според него, членството во НАТО ќе помогне и во остварувањето на втората стратегиска цел, членство во ЕУ бидејќи, како што рече, постои блиска комплементарност и соработка меѓу двете организации.
„Ние ги споделуваме заедничките вредности и сакаме да придонесеме во развојот на таа соработка“, порача Спасовски.