Интересот на Република Северна Македонија, на граѓаните што живеат во земјата, иднината и перспективата на оваа држава и на овој народ, мора да бидат во фокусот на вниманието на Владата, смета министерот за внатрешни работи кој е и потпретседател во владејачката партија
Министерот за внатрешни работи Оливер Спасовски денеска рече дека она што се прави од премиерот и од Владата во однос на актуелната ситуација со Бугарија е да се отворат перспективите, да се покаже јасен пат и силна волја дека може да се најде начин и да се постигне договор за тоа како заеднички да се продолжи напред.
Тој го посочи примерот со Грција, кој треба да се примени и со Бугарија, преку почитување на достоинството на двата народа и на двете држави – да не се заборави тоа што се случувало, меѓутоа да си простиме во духот на пријателството и заеднички да продолжиме кон градење на мирот, стабилноста и напредокот на овој регион.
„Сметам дека таа желба што ја имаат и премиерот и членовите на Владата и огромен број граѓани е да не се дозволи тоа што се случувало пред седум или осум децении да биде пречка за нашата перспектива и за нашата иднина. Никако да не заборавиме што се случувало во минатото, никој не може да ги побие кои било од историските факти, меѓутоа мораме да одиме напред. Историјата треба да ја оставиме на историчарите, а иднината е во наши раце. Сите заедно треба да продолжиме кон подобра, посветла иднина и перспектива“,
рече министерот Спасовски одговарајќи на новинарско прашање во врска со ставовите искажани од премиерот Заев во интервјуто за БГНЕС.
Тој истакна дека интересот на Република Северна Македонија, на Македонците, на граѓаните што живеат во нашата земја, иднината и перспективата на оваа држава и на овој народ, мора да бидат во фокусот на вниманието на Владата.
Нагласи дека македонскиот јазик и македонскиот идентитет се нешто за кое никој не може и не смее да разговара, а не да преговара, затоа што, како што рече, тоа е право на самоопределување.
Но, додава, треба да се продолжи со барање решенија за отворање на перспективите за иднината на земјата.
Спасовски не сакаше да го коментира ставот на поранешниот претседател на СДСМ и поранешен премиер и претседател на државата Бранко Црвенковски, туку само кусо одговори дека секој има право на свое мислење и став за секое прашање.