Тој додаде дека се остава период од една година за имплементација поради тоа што има постапка за трошењето на буџетските пари
Министерот за внатрешни работи Оливер Спасовски вели, согласно Уредбата што неодамна ја донесе Владата, двојазични амблеми ќе има само за службите на локално ниво, таму каде што официјален јазик е и албанскиот. Амблемите, нагласи, нема да бидат двојазични за централните служби и единиците што се на ниво на држава.
„Таму каде што на локално ниво се работи, значи за амблемите на униформа на локално ниво во градови каде што официјалниот јазик е албанскиот јазик. Значи, за централните служби кои се однесуваат за цела држава нема да има никаква промена во делот на униформите, согласно тоа и на единицата ‘Тигар’ и на Единицата за брза распределба“,
рече Спасовски во одговор на новинарско прашање.
Тој додаде дека се остава период од една година за имплементација поради тоа што има постапка за трошењето на буџетските пари.
„Не може да се влезе во продавница и да купите нешто веднаш, туку треба да се спроведат постапки – тендери, јавни набавки, да се набави тоа што треба да се набави во делот на амблемите и затоа се остава таков период во којшто ќе може да имаме подготовка и активирање“,
рече министерот Спасовски.
Тој рече дека донесената Уредба произлегува од Законот за употреба на јазиците.
„Ние моравме да ги запазиме тие чекори и затоа се промени легислативата во овој дел. Имавме година дена период на усогласување за да се спроведат постапките. Значи, тоа е нормална работа што се спроведува, не е ништо ново посебно во овој дел што би предизвикало какви било други проблеми“,
нагласи министерот за внатрешни работи.