Во текот на март, не е одржана ниту една седница на Советот на општина Тетово, поради кризата со коронавирусот. Претседателот на Советот, Беким Мемети, како што пренесува МИА, вели дека одлуката да нема седници ја донел во консултации со градоначалничката на Тетово Теута Арифи, координаторите на советничките групи, ЗЕЛС, како и согласно препораките на владата. За овој месец, вели, дека ќе почекаат да видат како ќе се одвиваат работите, освен ако има потреба од итна седница.
Од опозицијата, пак, бараат да се свика итна седница на Советот, со цел да се донесат мерки за справување со негативните ефекти од кризата поради епидемијата на коронавирусот.
-Градоначалничката да предложи итни мерки, да се откаже од дел од средствата од најголемите приходни ставки (комуналиите, комуналните такси, закупот на јавен простор…), со цел да им помогне на граѓаните и правните лица кои редовно ги плаќаат давачките кон градот. Повикувам да се свика итна седница на Советот, со цел градоначалничката да донесе низа мерки, како, на пример, да преземе дејствија за спуштање на минимум на комуналната такса за закуп на јавен простор за 2020 година, да ја намали фирмарината за стопанските субјекти согласно законскиот минимум, да донесе одлука за замрзнување на обврската за плаќање на зонско паркирање, одложена исплата на комуналиите, ваучери за социјално загрозените категории, ваучери за храна за сиромашните, да обезбеди телефонска линија за помош на социјално загрозените категории, да обезбеди компјутери за децата кои немаат услови да следат онлајн настава. Конечно да ја пушти во употреба градската капела“,
истакна Александар Велјановски, координатор на советничката група на ВМРО-ДПМНЕ.
Во Тетово досега се регистрирани 15 заразени со коронавирусот.