При гласањето, кое беше јавно, позитивно по предлогот на Владата се изјаснија членовите на Советот, Кети Петкова, Ардиан Демири и Маријана Илиеска. Другите шестмина гласаа за негативно мислење
Со мнозинство од шест гласа Советот на јавни обвинители даде негативно мислење, односно се изјасни против предлогот на Владата за разрешување на државниот јавен обвинител Љупчо Коцевски.
Од деветтемина членови на Советот, на денешната седница предлогот за разрешување го поддржаа тројца.
Имено, при гласањето, кое беше јавно, позитивно по предлогот на Владата се изјаснија членовите на Советот, Кети Петкова, Ардиан Демири и Маријана Илиеска. Другите шестмина гласаа за негативно мислење.
„Со оглед дека одлуките се носат со мнозинство гласови од мнозинството членови, тоа значи дека Советот даде негативно мислење по предлогот на Владата за разрешување на јавниот обвинител на Република Северна Македонија, Љупчо Коцевски”,
констатираше претседателката на Советот на јавни обвинители, Душица Димитриеска.
Од тројцата членови на Советот кои се изјаснија позитивно по предлогот на Владата за разрешување на актуелниот државен јавен обвинител, Петкова за членка е избрана од Собранието во јули 2023 година, нејзината колешка Маријана Илиеска една година подоцна, но од редот на обвинителите, а Ардиан Демири член на ова тело стана во декември лани. И тој, како Петкова беше избран од Собранието.
На седницата не присуствуваше јавниот обвинител Коцевски, како што налага законската процедура во ваков случај.
Инаку, дискусијата, која беше зад затворени врати, односно со исклучена јавност, траеше околу половина час. Предлогот седницата да биде затворена го даде членката на Советот, Зорица Павловиќ, која се повика на член 10 од Законот за Советот на јавни обвинители, а едногласно беше поддржана од останатите членови.
Образложението за исклучување на јавноста беше заради заштита на угледот и интегритетот на јавниот обвинител, како и заради податоците и доказите што тој ги навел во своето произнесување по однос на предлогот за негово разрешување.
Идентично беше и објаснувањето што Димитриеска го даде за медиумите во врска со затворањето на седницата за јавност.
Прашана дали негативното мислење на Советот ќе биде земено предвид доколку продолжи постапката за разрешување на Коцевски, Димитриеска одговори:
„Тоа е сепак прашање за Владата”.
Инаку, Владата одлучи да ја запре постапката за разрешување на Коцевски по трагедијата во Кочани.
Имено, минатата недела, односно на 25 март, премиерот Христијан Мицкоски рече дека постапката, која беше иницирана од Владата во февруари, треба да остане во фазата во која се наоѓа во моментов поради истрагата за пожарот т.н. кабаре во Кочани на која работи тим од 11 обвинители.
Веќе следниот ден, кога случајно или не беше одложена седницата на Советот на јавните обвинители поради немање кворум, владината портпаролка Марија Митева на прес-конференција, соопшти дека Владата ќе ја прекине постапката за разрешување на државниот јавен обвинител Љупчо Коцевски, дури и доколку добие мислење од Советот на јавни обвинители во врска со предложеното разрешување.
Тоа, како што појасни таа, значи дека дури и да го добие мислењето од Советот на ЈО, Владата нема да го испрати до Собранието на понатамошно одлучување.