Според новото законско решение, се предвидува оддалеченост на објектите во кои се приредуваат игри на среќа и забавни игри да биде најмалку 500 метри од образовни институции, подигнување на критериуми и услови за добивање лиценца и значително зголемување на давачките за приредувачите на игри на среќа и забавни игри
Министерството за финансии (МФ) апелира Собранието што поскоро да ги усвои измените на Законот за приредување игри на среќа со кои ќе се овозможи обложувачниците да бидат на најмалку 500 метри оддалеченост од училиштата.
Измените и дополнувањата на Законот кој е подготвен од МФ е испратен до Собранието од јуни минатата година, а како што посочуваат од Министерството, тој е во собраниска процедура, во прво читање.
„Во јуни 2021 година е испратен во Собранието, а на дневен ред на седница на Комисијата за финансирање и буџет, како матично работно тело, беше ставен на разгледување на 34-тата седница закажана за 9 февруари 2022 година, а на истата не се изгласа ниту дневниот ред. Оттогаш не е закажано ново продолжение на седницата за да може да се разгледа ова законско решение кое е насочено пред се да ја заштити малолетната популација од стекнување несоодветни навики“,
велат за МИА од Министерството за финансии.
Според новото законско решение, се предвидува оддалеченост на објектите во кои се приредуваат игри на среќа и забавни игри да биде најмалку 500 метри од образовни институции, подигнување на критериуми и услови за добивање лиценца и значително зголемување на давачките за приредувачите на игри на среќа и забавни игри.
Со цел да се оневозможи лесниот пристап на малолетните лица, со Законот меѓу другото, се предлага и воведување ограничување на бројот на уплатно-исплатни места на обложувачниците, како и ограничување на бројот на деловните простории на автомат клубовите што се отвораат со една издадена лиценца, како и воведување надомест за секое ново уплатно-исплатно место, односно деловна просторија за автомат клуб.
„Оттука, може да истакнеме, дека апелираме до законодавната власт за побрзо донесување на ова законско решение, но од друга страна апелираме и до приредувачите на игри на среќа и забавни игри да не поднесуваат барање за отворање уплатно-исплатни места на игри на среќа во близина на образовни институции, затоа што со донесувањето на новото законско решение истите ќе треба да се затворат“,
посочуваат од Министерството за финансии.
Од матичната Комисијата за финансирање и буџет, пак, засега нема најава за одржувањето на седницата, но посочуваат на тоа дека за предлог-законот, ќе се постапува согласно со собранискиот Деловник, а откако ќе бидат исцрпени двете точки што се на дневен ред на комисиската седница.
Претседателот на Комисијата, Бојан Стојановски, за МИА изјави дека предлог-законот е трета точка на дневен ред на Комисијата.
„Согласно со Деловникот на таа Комисија е закажана седница со три точки: Првата е предлог-финансискиот план на Агенцијата за супревизија на осигурувањето, втората се предлог-измените на Законот за ДДВ, а третата предлог-законот за изменување и дополнување на Законот за игри на среќа. Согласно Деловникот, мора да ја испочитуваме листата на пријавени за првата точка, а од вкупно 30 поминат е само еден пријавен. Потоа ќе следува широка дебата за измени на Закон за ДДВ за кои ги немаше потребните консултации“,
изјави Стојановски.