Во 11:43 часот, добиена е пријава за заглавено возило, фамилија со две мали деца во снегот, пред хотел „Радика“, с. Леуново. РЦУК Тетово извести дека од страна на ЈП за одржување на магистралните и регионалните патни правци добиле информација дека висината на снежната покривка е околу 80 см и дека веќе работат на расчистување на патот околу Мавровското Езеро, но тоа им е отежнато поради паднати дрвја на патот, велат од ЦУК
Обилните врнежи од дожд и снег го отежнуваат сообраќајот, а до Центарот за управување со кризи денеска стигнале дојави за заглавени лица и затрупано возило во Маврово. Преку единствениот број за итни повици 112, околу 10 часот добиена е пријава за заглавени лица од ТППЕ Гостивар во снегот кај село Леуново, велат од ЦУК.
„Исто така, во 11:43 часот, добиена е пријава и за заглавено возило, фамилија со две мали деца во снегот, пред хотел ’Радика’, с. Леуново. РЦУК Тетово извести дека од страна на ЈП за одржување на магистралните и регионалните патни правци добиле информација дека висината на снежната покривка е околу 80 см и дека веќе работат на расчистување на патот околу Мавровско Езеро, но истото им е отежнато поради паднати дрвја на патот“,
информира ЦУК.
Од Јавното претпријатие за одржување на магистрални и регионални патишта „Македонија пат“ информираат дека со сите расположливи екипи се на терен и во континуитет се врши расчистување на државните патишта.
„По добиените информации од терен, сите државни патни правци се проодни за сообраќај, тој се одвива во зимски услови и по влажни коловози“,
велат од „Макеоднија пат“.
Оттаму апелираат до сите возачи да ги почитуваат законските одредби за одвивање на сообраќајот во зимски услови, односно задолжително да поседуваат зимска опрема за возилата, внимателно да управуваат со возилата, да ја почитуваат поставената сообраќајна сигнализација и да ја приспособат брзината кон условите на патот.
„Исто така апелираме да се следи временската состојба и сите граѓани кои планираат да патуваат навреме да се информираат од сообраќајните служби за условите на државните патишта“,
се наведува во соопштението.