Агенцијата за млади и спорт и фирмата „Алкон проект“, која ја градеше спортската сала на Универзитетот „Свети Кирил и Методиј“, ќе поминат уште еден судски циклус за да докажат кој е во право околу спорот за салата
Врховниот суд го врати предметот на повторно одлучување, иако на пониските судови спорот го добиваше фирмата тужител, по што извршител успеа да извлече 50 милиони денари (810 илјади евра) од Агенцијата.
Фирмата „Алкон проект“ ги доби пресудите на пониските судови затоа што тврдеше дека поднела времена ситуација – попис и фактура на сѐ што е сработено во конкретна фаза од градењето на објектот, а Агенцијата не ја платила целосно. Од Агенцијата, пак, тврдат дека фирмата наместо во квадратни метри дел од материјалот го прикажала во кубни метри. Затоа побарале и платиле коригирана времена ситуација во помала сума, со која тврдат дека претходната се става надвор од сила.
Така не мислел ниту Основниот суд во Тетово ниту Апелациониот суд во Гостивар, кој во пресудите, иако се осврнуваат на коригирањето, сепак не го зеле предвид. Причината, според пониските судови, е што и спорната времена ситуација била првично потпишана од надзорниот орган и од Агенцијата.
Фирмата бараше исплата на основен долг од 440 илјади евра, кој, со камата, парнични трошоци и извршителска награда, стигна до околу 810 илјади евра. Извршителскиот налог го примил и го потпишал в.д. директорот на Агенцијата за млади и спорт Измет Нури од ДУИ затоа што во меѓувреме Дарко Каевски од СДСМ од директор стана пратеник.
Одлуката на највисокиот суд доаѓа откако Агенцијата за млади и спорт, застапувана од Државното правобранителство, поднесе ревизија на пресудата на гостиварскиот апелациски суд.
Врховен смета дека ревизијата е основана од причина што пресудата е нејасна, како и дека пониските судови не испитале дали предметниот договор содржи одредби како ќе се утврди конечната вредност на објектот и доколку содржи како се однесувале договорните страни. Наведената околност, според Врховен, е релевантна за правилната примена на материјалното право.
Така, Агенцијата за млади и спорт добива шанса за ново судење. Од Правобранителството, кое ја застапува Агенцијата, за „360 степени“ велат дека ќе поднесат барање за противизвршување до Основниот суд Тетово.
Спортската сала на УКИМ од затворен тип е инвестиција на Агенцијата за млади и спорт, која требаше да му биде подарена на Универзитетот. Седум години откако е ставен камен-темелник, Агенцијата не сака да ја преземе салата затоа што тврди дека „Алкон проект“ не ги завршил сите работи предвидени со договорот, па оттаму не можеле да направат технички прием и да му ја предадат на УКИМ како краен корисник.
Иако објектот е во финална фаза, никогаш не проработи, а од најавите за ултрамодерна сала, во дворот на УКИМ остана објект со руинирана опрема и инсталација и отворени врати.
„360 степени“ емитуваше прилог за судската сага на штета на државата, која може да го погледнете во продолжение.