Претседаелот Пахор, распишувајќи ги изборите, рече дека потоа ќе даде мандат за формирање нова влада на кандидат кој очигледно има апсолутна поддршка во 90-члениот словенечки парламент. За таа цел тој ќе побара да му бидат доставени 46 потписи
Словенечкиот претседател Борут Пахор денеска ја потпиша одлуката за одржување парламентарни избори во Словенија на 24 април.
Како што истакна по потпишувањето на одлуката, се одлучил за првиот можен датум по консултациите со политичките партии пред два месеци и смета дека на овој начин ќе се овозможи Словенија да добие нова влада пред летната пауза на парламентот.
Пахор рече дека по конституирањето на новиот парламент и консултациите со партиските лидери, ќе даде мандат за формирање нова влада на кандидат кој очигледно има поддршка од апсолутното мнозинство во 90-члениот словенечки парламент. За таа цел тој ќе побара да му бидат доставени 46 потписи за поддршка на кандидатот за мандатар.
„Знам дека таквата постапка не е пропишана норма“,
рече Пахор, додавајќи дека на таква одлука бил поттикнат од искуството по парламентарните избори во 2018 година.
Тогаш Пахор го даде мандатот за состав на новата влада на претседателот на Словенечката демократска партија (СДС) Јанез Јанша (актуелен премиер), бидејќи таа партија доби релативно мнозинство гласови и мандати, но Јанша подоцна го врати мандатот бидејќи другите партии одбија да влезат во потенцијална коалиција со него.
Јанша дојде на чело на владата во март 2020 година, откако претходната влада на Марјан Шарец го загуби парламентарното мнозинство и поднесе оставка.Доколку по годинешните парламентарни избори не ги добие заверените потписи од мнозинството пратеници кои поддржуваат еден кандидат за премиер, Пахор рече дека во тој случај прво ќе му го даде мандатот на кандидат на партијата што освоила релативно мнозинство во парламентот.