Седум од 12 региони се на црвената листа со над 140 заразени на 100 000 жители
Во Словенија од денеска ќе стапат во сила заострени мерки против ширење на коронавирусот, кои вклучуваат учење на далечина, забрана за движење меѓу регионите, ограничувања на собири и задолжително носење маски на отворено во регионите кои се на „црвената листа“. Од 12 региони – седум се на „црвената листа“.
Учениците од петто одделение и повисоките класови од основното училиште ќе учат на далечина, барем до есенскиот распуст, кој започнува во последната недела од октомври, кога ќе се преразгледа ситуацијата, пренесе агенцијата СТА.
Мерката ќе важи и за средните училишта и ги повика факултетите да работат што е можно повеќе преку интернет.
Премиерот Јанез Јанша рече дека меѓу новите мерки што владата ги донела поради влошената епидемиолошка состојба, е и активирањето на резервните капацитети во здравствениот систем.
Седум од 12 словенечки статистички региони го надминаа прагот од 140 нови случаи на вирусот на 100 000 жители во период од две недели. Во нив движењето меѓу регионите ќе биде забрането, додека собирите ќе бидат ограничени на 10 лица.
Воведена е обврска за носење маски на отворено, а одредени активности, како што се спортски настани, ќе бидат откажани.
Станува збор за регионите Централна Словенија, Горењска, Корошка, Засавје, Посавје, Савиња и Југоисточна Словенија.
Мерките се воведуваат откако во Словенија веќе неколку дена има високи бројки на новозаразени, а вчера имаше 707 нови случаи, што е најголем дневен пораст на новозаразени од почетокот на епидемијата во таа земја.