Опозициските советници ги нападнаа скопскиот градоначалник и мнозинството во Советот на Градот дека сакаат да го преименуваат и булеварот „Борис Трајковски“, каде што тие денеска се собраа на протест
Советничката група на ВМРО-ДПМНЕ во Град Скопје бара повлекување на точката за преименување на улиците од дневниот ред на утрешната седница.
Според советничката на ВМРО-ДПМНЕ, Јелена Жугиќ, Шилегов гази по жртвата и по имињата на митрополит Теодосиј Гологанов, на Борис Сарафов, на Христо Батанџиев, на Мајка Тереза, на Киро Глигоров и на Борис Трајковски.
Советници на ВМРО-ДПМНЕ се собраа денеска на протест на булеварот „Борис Трајковски“, од каде што Жугиќ му порача на Шилегов дека создавал апсурдни ситуации – „предлага за имиња на улици странски претседатели, а го трга името на покојниот претседател Трајковски“.
„Трајковски е еден од темелите врз кои ја градиме нашата модерна државност, а Шилегов не смее да ја гази неговата посветеност, работа и жртва за Македонија. Оттука уште еднаш го повикуваме Шилегов, повлечете ја точката за преименување на улиците и немојте да газите врз луѓе кои животот го посветиле на Македонија“,
рече Жугиќ.
Советниците на ВМРО-ДПМНЕ бараат да се спроведе и широка јавна расправа во која ќе биде вклучен и Институтот за историја и други релевантни чинители, како и општините во градот Скопје, кои, како што велат, не се воопшто прашани за предлогот на градоначалникот Шилегов.
Предлог-листата за дополнување на листата на имиња на улици е засега последна точка на дневен ред на утрешната седница на градскиот Совет.
Најавено е враќање на старите на дел од скопските улици што беа сменети во периодот кога мнозинството во градскиот Совет и градоначалничкото место во главниот град и во повеќето општини ги имаше ВМРО-ДПМНЕ. Тогаш, преименувањето на улиците, а посебно „бришењето“ на имиња на херои од НОВ и ставање на имиња од периодот на антиката предизвика силни реакции во јавноста.
Целата листа може да се погледне тука.
За обвинувањата од ВМРО-ДПМНЕ дека со промената на имињата на улиците се прави идентитетски геноцид, Шилегов изјави неодамна дека пред десет години, кога се менуваа имињата на улиците, никој не ги праша скопјани дали се согласуваат со тоа.