Одбивање да се учествува во пописот ќе им направи штета на сите граѓани на државата, вели директорот на Заводот за статистика Апостол Симовски.
„Секој оној што ќе се обиде да одбие, да не учествува во пописот си прави штета себеси и на сите граѓани во државата. Апелирам сите да го прифатат пописот бидејќи ова е општествено-корисна акција, ова не е во интерес на ниту една политичка структура во државата, туку е во интерес на сите граѓани во државата. Податоците од пописот имаат голема употреблива вредност и пред сѐ во правец на развој на општеството, во сите елементи, од економија, образование, здравство, па сѐ до секојдневниот живот на граѓаните“,
рече Симовски.
Додаде дека за време на пописот секој податок ќе се проверува преку неколку бази на податоци и апелира за веродостојност на информациите што ќе им бидат давани на попишувачите. Симовски рече дека покрај базата на МВР, во која се регистрира влез и излез од државата, ќе се користи и базата од Министерството за здравство, МТСП, УЈП, но и други бази на податоци.
Во однос на изјавите за можно одложување на пописот, Симовски истакна дека како Завод за статистика не коментираат политички изјави и оти се водат од Законот за попис, каде што е утврден периодот за спроведување на пописот и сите рокови врзани со пописот и оти тој Закон мора да го почитуваат.
Тој рече дека дијаспората ќе се попишува еден месец пред започнувањето на пописот, односно преку апликација што ќе биде во функција од 1 март. Посочи дека преку оваа апликација ќе се попишуваат само лица што се надвор од државата и таа е со посебни процедури и критериуми и додаде дека се работи за исклучително безбедна апликација.
На денешната прес-конференција беше објавена и методологијата за подготовка, организација и спроведување на пописот во април. Таа е објавена во „Службен весник“, но може да се види и на веб-страницата на Државниот завод за статистика.
Собранието на 21 јануари го донесе Законот за попис на населението, домаќинства и становите во Република Северна Македонија, според кој пописот треба да се спроведе од 1 до 21 април годинава. Законот гарантира одржување попис според меѓународните стандарди и стандардите на Евростат.
Опозицијата останува на ставот дека пописот треба да се одложи за наредната година, или ако се инсистира тој да се одржи пролетва, да се спроведе по електронски пат. ВМРО-ДПМНЕ, формално, почна и иницијативата за укинување на Законот за попис. Наспроти барањето на ВМРО-ДПМНЕ за електронски попис, од СДСМ се со став дека таков вид статистичка операција нема да ги даде комплетните податоци какви што се потребни и кои треба да бидат според стандардите на Евростат.