Дополнително, претседателката на државата вели дека надлежните институции треба да спроведат темелна истрага за настанот и да преземат соодветни мерки за одговорните лица
Остра осуда за синоќешните инциденти, во кои беше сквернавено македонското државно знаме, попладнево стигна и од претседателката на државата, Гордана Сиљановска-Давкова. Таа на својот фејбук-профил напиша дека станува збор за чин на непочитување на државните симболи, но и директно поткопување на заедништвото на сите македонски граѓани што тоа знаме го симболизира.
„Ваквите постапки не придонесуваат за градење доверба и почит меѓу граѓаните, туку поттикнуваат дополнителни тензии и поделби“,
вели претседателката на државата.
Повикот за разум, толеранција и дијалог, додава таа, е клучен во вакви моменти.
Дополнително, Сиљановска-Давкова вели дека надлежните институции треба да спроведат темелна истрага за настанот и да преземат соодветни мерки за одговорните лица.
Во меѓувреме од републичкото Јавно обвинителството соопштија дека надлежното Основно јавно обвинителство Скопје повело постапка против четири лица, кои се осомничени за предизвикување омраза, раздор и нетрпеливост врз национална, расна, верска и друга дискриминаторска основа, според член 319 став 1 од Кривичниот законик.
На тројца од осомничените, кои се полнолетни, Обвинителството бара судот да им одреди мерка притвор, додека за четвртото лице, кое е малолетник ќе се води редовна постапка, според Законот за правда за децата.
Министерот за внатрешни работи, Панче Тошковски претходно денеска информира дека по синоќешните инциденти во Скопје се уапсени осум лица.
Четворица од уапсените лица се лишени од слобода поради учество во тепачка, а другите за предизвикување национална, расна и верска омраза, раздор и нетрпеливост. Уапсените, рече, Тошковски, се млади луѓе на возраст од 18, 19,20 и 21 година, а еден од нив е и малолетен.
„Четири лица се уапсени поради тоа што за нив имаме основано сомнение дека сториле кривично дело 319 од Кривичниот законик кое се однесува на предизвикување национална, расна и верска омраза, раздор и нетрпеливост и каде што е предвидена минимална казна од една година затвор. За овие четири лица ќе бидат поднесени соодветни кривични пријави“,
рече Тошковски.
Тој најави дека денеска и во наредните денови ќе има уште многу што ќе бидат повикани на разговори, а за кои постојат сомневања дека биле вклучени во овие дејствија.
Во врска со синоќешните инциденти, кои се случија за време на прославата на Денот на албанското знаме, при што беше осковернавено македонското денеска со реакции излегоа и владејачките и опозициските партии.
Коментирајќи го настанот, премиерот Христијан Мицкоски денеска одговарајќи на новинарски прашања рече дека претходно предупредиле дека ќе се случуваат ваков тип обиди за ескалзација и креирање на етнички тензии.
Според премиерот, вчерашниот инцидент нема да биде единствен и изолиран случај.
„Очекувајте да има и во иднина бидејќи како правдата пополека, но сигурно се доближува до криминалците, така тие ќе стануваат понервозни и понетрпеливи. Единствениот начин да го одбранат криминално стекнатиот капитал е токму вака – со манипулирање и предизвикување ваков тип инциденти“,
изјави Мицкоски.
Осудувајќи го инцидентот, претседателот на Собранието, Африм Гаши, изјави дека дека палење и газење државни знамиња е во спротивност со државните и националните интереси на секоја етничка заедница и повика да се истражи кој стои зад инцидентот, иако рече дека не верува оти тој има политичка заднина.