Сепак, додаде дека нема комуникација со нив и дека не е истражен орган за да открива каде тие се наоѓаат
Поранешниот прв вицепремиер Артан Груби и ексдиректорот на „Државна лотарија“, Перпарим Бајрами, кои веќе неколку месеци се во бегство, според лидерот на Демократската унија за интеграција (ДУИ) се наоѓаат некаде во регионот, пренесува ТВ Алсат.
Сепак, додаде дека нема комуникација со нив и дека не е истражен орган за да ја открива нивната локација.
„Не работам ниту во Обвинителството, ниту во истражните органи. Сигурно не се на места далеку од регионот. Немам комуникација со нив и не сум тој што треба да ја откривам нивната локација“,
рече лидерот на ДУИ.
Министерството за внатрешни работи (МВР) во декември минатата година распиша меѓународни потерници по поранешниот прв вицепремиер Артан Груби и ексдиректорот на „Државна лотарија“, Перпарим Бајрами.
Груби и Бајрами се осомничени дека како соизвршители и одговорни лица во АД „Државна лотарија“, вршејќи ги своите посебни овластувања и должности, во 2023 година направиле штета на акционерското друштво со намера противправно да прибават буџетски средства на Лотарија во износ од над осум милиони евра. Обвинителството ги сомничи за кривичното дело проневера во службата.
Претходно, Груби се најде на т.н. „црна листа“ на американскиот Стејт департмент од каде посочија дека е вмешан во значителна корупција преку примање мито за предмети поврзани со поранешниот директор на УБК, Сашо Мијалков.