Тоа прашање би можело да биде една од главните теми на кампањата за следните парламентарни избори закажани за 11 септември
Шведската премиерка Магдалена Андерсон денеска изјави дека не исклучува кандидатурата за членство во НАТО по руската инвазија врз Украина, иако досегашниот нејзин став беше дека сака Шведска да биде надвор од сите воени сојузи.
„Во никој случај не исклучувам кандидатура за членство во НАТО. Сакам да направам сеопфатна анализа на можностите што ги имаме во оваа ситуација на закани и ризици за да ја донесеме најдобрата одлука за Шведска“,
изјави Андерсон за јавната телевизија СВТ.
Шведска не е членка на НАТО, иако е партнер на Северноатлантската алијанса и се откажа од строгата неутралност по завршувањето на Студената војна.
На денот на инвазијата врз Украина, 24 февруари, Магдалена Андерсон ја отфрли можноста за членство, велејќи дека „во оваа ситуација, важно е Шведска да ја задржи сегашната насока во безбедносната политика“.
Во Шведска војната во Украина предизвика невообичаено зголемување на поддршката за членство во НАТО од речиси 50 отсто, според анкетите објавени на почетокот на март.
„Многу луѓе во Шведска размислуваат за тоа во моментов, и јас размислувам многу за тоа“,
рече Андерсон.
Тоа прашање би можело да биде една од главните теми на кампањата за следните парламентарни избори закажани за 11 септември.
Ден по руската инвазија на Украина, портпаролката на руското Министерство за надворешни работи Марија Захарова предупреди дека пристапувањето или на Финска или на Шведска во НАТО ќе предизвика сериозен одговор од Москва.
„Сакам да бидам јасна. Шведска и само таа самостојно одлучува во која насока ќе оди во однос на сопствената безбедност“,
изјави тогаш шведската премиерка.