Законот за „добро однесување“ ќе се применува на идните апликанти, оние чии апликации се обработуваат, а исто така и ретроактивно на многу сегашни жители
Шведскиот парламент гласаше за заострување на законите за имиграција, поддржувајќи мерки што им овозможуваат на властите да ги поништат дозволите за престој врз основа на нејасни критериуми за лошо однесување и ги обврзуваат повеќето вработени во јавниот сектор да го пријават секој за кого се сомневаат дека е недокументиран, пишува „Гардијан“.
Новото законодавство доаѓа пред парламентарните избори во септември и е дел од политиката на централно-десничарската влада, која се потпира на поддршката на крајно десничарските Шведски демократи, за создавање една од најнепријателските средини за неевропејците во Европа.
Законот за „добро однесување“ ќе се применува на идните апликанти, оние чии апликации се обработуваат, а исто така и ретроактивно на многу сегашни жители.
„Секој што не се однесува правилно не може да смета на останување“,
вели шведскиот министер за миграција Јохан Форсел.
Иако законот не прецизира кое однесување се смета за неприфатливо, владата претходно наведе примери како што се неплатени долгови, даночно затајување, криминал и врски со екстремистички организации. Задачата за проверка на дозволите ќе ѝ падне на Шведската агенција за миграција, а секоја одлука ќе биде предмет на жалба.
Законот беше остро критикуван од опозициските политичари и здруженијата за човекови права, опишувајќи ги критериумите како произволни.
„Ова би довело до ризик дозволите за престој да бидат одбиени или одземени врз основа на однесување кое не е ниту нелегално ниту казниво за шведските граѓани“,
предупреди неодамна „Амнести интернешнл“.
Заштитниците на граѓанските права со седиште во Стокхолм изјавија дека законодавството „го поткопува владеењето на правото“.
„Законот за добро управување ги остава луѓето во незнаење за тоа какви дејствија или изјави би можеле да се користат против нив“,
додадоа тие во соопштението.