Поради немање доволно податоци за ефикасноста, придобивките и ризиците, Швајцарија одлучи засега да не ја одобри вакцината на „Астра Зенека“ и Универзитетот Оксфорд. Националното регулаторно тело за лекови „Свисмедик“ соопшти дека му се потребни повеќе податоци за ефикасноста од поголемите испитувања на оваа вакцина, односно оние во Северна и Јужна Америка.
„Моментално достапните податоци нѐ упатуваат на тоа да се донесе позитивна одлука“,
соопштија од „Свисмедик“.
Сепак, нагласуваат дека откако ќе ги добијат резултатите од испитувањата, за кратко време ќе можат да издадат привремено одобрение за употреба на вакцината.
Швајцарските власти од „Астра Зенека“ претходно веќе нарачаа 5,3 милиони дози.
Со одлуката да го одложат одобрувањето на вакцината, исто така соопштија и дека нарачале дополнителни дози од други производители.
Вакцината на „Астра Зенека“ минатата недела доби одобрение од Европската агенција за лекови (ЕМА). Меѓутоа, дел од земјите одлучија да препорачаат таа да не се користи кај постарите лица поради недостигот на податоци за нејзината ефикасност. Италијанската агенција за лекови, на пример, препорача таа да не се користи кај постарите од 55 години. Ист е случајот и во Белгија, додека Ирска препорача таа да не се користи кај постарите од 70 години.
Пред десетина дена два германски весника, „Билд“ и „Ханделсблат“, во одделни извештаи пишуваа дека ефикасност на вакцината е слаба кај лицата постари од 65 години, но таквите информации веднаш наидоа на демант од компанијата. Од „Астра Зенека“ порачаа дека пишувањата на германските весници се целосно невистинити.