Одговарајќи на новинарско прашање, министерката за животна средина и просторно планирање рече дека до денеска не добиле одговор од грчката компанија зошто се откажала од проектот
Министерката за животна средина и просторно планирање Каја Шукова денеска изјави дека во Министерството во тек е подготовка на информацијата со која треба да ја известат Владата за одлуката за поништување и затворање на тендерската постапка за изградба на хидроцентралата „Чебрен“.
Ваквиот исход следуваше откако грчката компанија „Архиродон“, која беше единствен понудувач и првично го доби тендерот за изградба на капиталниот проект, не стави потпис на договорот во предвидениот временски рок.
Одговарајќи на новинарско прашање, Шукова рече дека до денеска не добиле одговор од грчката компанија зошто се откажале од проектот.
Информацијата на Министерството, како што најави ресорната министерка, треба да се најде на дневен ред на наредната седница на Владата.
„До денеска наутро сè уште немаше ништо од грчката компанија, а подготвуваме веќе информација до Влада и подготвуваме одлука заедно со правниците и консултантите. На наредната седница на Влада оваа информација ќе оди за поништување, значи за одлука за поништување и за затворање на процесот за Чебрен“,
рече Шукова во одговорот на новинарско прашање по денешната панел-дискусија во Скопје во рамките на кампањата на Владата „Европска иднина, поблиску од кога било“.
Инаку, Министерката за животна средина и просторно планирање на прес-конференција на 3 јануари, годинава, информира дека тендерот за изградба на „Чебрен“ – 14. по ред, пропадна, затоа што заклучно со 31 декември 2023 година не пристигнало продолжување на банкарската гаранција од страна на избраниот понудувач на тендерот, односно грчката фирма „Архиродон“.
Шукова тогаш рече дека откако во Министерството ги разгледале сите документи согласно тендерското досие, документацијата и постојните закони во државата, сега за овој процес ќе подготви информација и ќе ја информира Владата дека ќе достави одлука за поништување на постапката.
„Согласно тендерската документација, додека е активна банкарската гаранција, понудувачот требаше да пристапи кон потпишување на договор за заедничко вложување со ЕСМ и тоа не го направи. Ние некаде околу 15 декември упативме допис до компанијата, да ја потсетиме дека банкарската гаранција е активна до 31 декември и дека треба да ја продолжи. Бидејќи не добивме никакви дополнителни информации од компанијата, банкарската гаранција веќе не е активна и понудата веќе не важи и не можеме да продолжиме понатаму“,
рече Шукова на прес-конференцијата на 3 јануари.
Како што изјави таа тогаш, фирмата понудувач испратила жалба во однос на одлуката на Владата и соопштиле дека имаат одредени услови кои не овозможуваат добри можности да обезбеди средства од банките за да може да го гради „Чебрен“.
„ППЦ – Архиродон“ на 14 септември 2023 година беше избран за најповолен понудувач на 14. тендер за изградба на реверзибилната хидроцентрала ПАХЕ „Чебрен“. Подоцна имаше забелешки на јавниот повик и до крајот на 2023 година требаше да одлучи дали ќе продолжи со проектот.
Владата на 14 септември на 185-тата седница донесе одлука со која се овозможи реализација на хидроцентралата „Чебрен“, со проценетата вредност на инвестицијата од околу една милијарда евра. Со одлуката е предвидена изградба на реверзибилна хидроцентрала со инсталиран капацитет од најмалку 333 мегавати. Предвидено е Чебрен да има функција на производство на електрична енергија, како и режим на пумпање и враќање на водата назад, со што е предвидено создавање ново вештачко езеро на Црна Река. По завршувањето на проектирањето и обезбедувањето на потребните документи се очекува да се почне со градба која е предвидена да трае седум години.
Идејата и проектирањето за големиот хидроенергетскиот проект „Чебрен“ започнува со првите физибилити студии во 60-тите години од минатиот век. Досега имало 13 неуспешни тендери во период од последните 20 години, а последниот јавен повик, пред тековниот, е објавен во 2016 година.