Корнелија Нинова од БСП рече дека изгласувањето недоверба нема да ги спречи да продолжат понатаму, додека Христо Иванов од Демократска Бугарија посочи дека треба да се најде политичка формула како понатаму, а не само да се бара поддршка од еден до друг пратеник за обезбедување мнозинство
Кирил Петков сигурно ќе биде премиер во идната влада на Продолжуваме со промените (ПП), порача Асен Василев кој заедно со Петков ја предводат ПП откако беше изгласана недоверба на актуелната влада.
Во собраниските ходници по изгласувањето недоверба, Василев коментираше дека од една страна се луѓето од опозициските партии и дел од Има таков народ на Слави Трифонов кои сакаат мафијата да опстане и да има заткулисни игри. Од друга страна, рече тој, се сите оние кои се борат против тоа и на крајот граѓаните треба да одлучат за што се.
Коментирајќи го изгласувањето недоверба со 123 гласа во 240-члениот парламент, Василев рече дека резултатот е многу добар, односно дека само четири гласа ја дели актуелната владејачка коалиција од победа.
„Мислам дека резултатот е многу добар. Четири гласа не делат од победа. После следните избори сигурен сум дека овие четири гласа против мафијата ќе ги имаме“,
рече Василев.
Тој заедно со премиерот Петков и останатите министри се приклучија на масовниот собир пред бугарскиот парламент за поддршка на актуелната влада.
„Единствената влада што ќе ја направиме ќе биде кабинет кој има поддршка да се бори со мафијата. Ќе бараме поддршка од сите оние кои се против мафијата“,
рече Василев на протестот.
На прашањето дали Петков повторно би бил кандидат за премиер во потенцијалниот иден кабинет на ПП тој одговори: „Сигурно“.
Петков, пак, на поддржувачите им порача дека коалицијата ќе се обиде да формира нова влада со помош на независни пратеници, а ако не успее тогаш ќе се оди на избори.
До изгласување недоверба на неговата влада дојде откако од коалицијата составена од четири партии излезе Има таков народ (ИТН) на Слави Трифонов.
Останатите двајца коалициски партнери (Бугарската социјалистичка партија – БСП и Демократска Бугарија) на Петков во првични реакции по изгласувањето недоверба порачаа дека продолжуваат понатаму.
Лидерката на БСП, Корнелија Нинова порача дека опозициските ГЕРБ, ДСП, Преродба, како и ИТН биле непринципиелни и работеле само за своите лични интереси. Излгасувањето недоверба, порача таа, нема да нè спречи.
„Ќе продолжиме со однесувањето кое го знаете во последните шест години. Гласањето за недоверба нема да нè спречи. Продолжуваме понатаму“,
рече Нинова.
Копретседателот на Демократска Бугарија, Христо Иванов, рече дека преговорите како понатаму ќе се одвиваат работите се во тек и дека со ПП на Кирил Петков ќе разговараат за сите можности за да се врати државата на колосек и на патот на вистинските длабоки промени.
„Треба да ја најдеме вистинската политичка формула како отсега може да се управува со земјата. Не сакам никого да лажам дека има некои едноставни решенија за кризата во која нè внесоа. Не ме терајте да давам предвидувања за понатаму. Следат дискусии, сериозни размислувања и барање политичка формула, а не само барање поддршка од еден до друг пратеник“,
рече Иванов.