Алармот го вклучи вчерашниот рекорден број новозаразени во 24 часа – 535, од кои најмногу во Скопје – 277
Комисијата за заразни болести денеска на состанок ќе одлучува за нови мерки. Министерот за здравство Венко Филипче вчеравечер изјави дека тие би вклучувале рестрикција на јавниот превоз, ограничување на работа на угостителски објекти, одредени економски субјекти, компании и секаде каде што се смета дека има ризик.
Алармот го вклучи вчерашниот рекорден број новозаразени во 24 часа – 535, од кои најмногу во Скопје – 277.
Министерот Филипче рече дека дел од мерките може да се насочени само на некои општини, некои може да важат на територијата на целата држава. За воведување полициски час, рече, лично смета дека во овој момент е сè уште рано, но во даден момент и тоа може да биде предложено.
„Еден од најдобрите параметри коишто ги следиме е капацитетот во болниците. Иако има слободни места, капацитетот се исполнува. Само претходниот ден имаше голем број приеми. Во функција е модуларната болница со дополнителните тимови. Болницата во Козле, исто така, е спремна. Но, гледаме дека се исполнуваат капацитетите и согласно со тоа можно е да предложиме и дополнителни рестрикции“,
рече министерот за здравство.
Вчера тој имаше состанок со директорите на установите за да се направи систем на ротација на лекарите специјалисти и медицинските сестри кои ќе работат во модуларното одделение од повеќе интернистички одделенија. Поради зголемениот обем на работа на епидемиолозите во последните денови, доцнат и статистиките и се објавуваат навечер. Затоа ќе се ангажираат и студентите од шеста година на Медицинскиот факултет да помагаат во центрите за јавно здравје за правење на епидемиолошките анкети.
Проблемот со чекањето за тестирање на сомнителните и со симптоми треба да биде надминат со брзите тестови, во наредните денови се очекува донација од 7 500, а ќе се набавуваат и со пари од заемот од Светска банка.
За училиштата засега не се размислува за предвремен зимски распуст, зашто е мал бројот на заразени деца во градинките и училиштата и во изолација се одреден процент. Но може, рече Филипче, да се смени функционирањето на наставата со физичко присуство за одредена општина или регион, според епидемиолошката состојба.