Ризици и опасности кои можат да ги загрозат добрата, здравјето и животот на луѓето и животните и безбедноста на државата, за чија превенција или справување е потребна употреба на поголем обем на ресурси.
Ова е дефиницијата за кризна состојба според Законот за управување со кризи. Владата денеска воведе ваква состојба во Дебар и Центар Жупа поради состојбата со коронавирусот во двете општини каде што досега се заболени седум лица.
„Новите случаи се причина зашто дополнително утрово разговаравме со членовите на Комисијата за заразни болести. Ги изложивме тие информации и до Управувачкиот комитет поради што тој препорача да се воведе кризна состојба во Дебар и Центар Жупа. Тоа значи ограничување на движењето на луѓето што живеат во овие општини, но и забрана за влез и излез од Дебар и Центар Жупа“,
рече минситерот за здравство Венко Филипче.
Одлуката за кризна состојба не може да трае подолго од 30 дена, а доколку има потреба да се продолжи, Владата треба да побара одобрување од Собранието за продолжување на рокот или да предложи прогласување на воена или вонредна состојба. Собранието и претседателот на државата во секое време може да побараат усмен или писмен извештај за состојбата во областа за управување со кризи.
Законот и овозможува на Владата да донесува oдлука за употреба на ресурсите на органите на државната управа, органите на општините и на Градот Скопје, како и за управување со нив во случај на кризна состојба. Употребата на ресурсите за остварување на активностите треба да биде пропорционална според природата и интензитетот на кризната состојба, разумна според карактерот на кризата и сериозна според јачината и обемот на кризата.
Законот предвидува дека со дел од своите сили може да учествува и Армијата во поддршка на полицијата во услови кога со кризната состојба е загрозена безбедноста на земјата, а органите на државната управа немаат соодветни ресурси и средства за нејзина превенција и справување.
*Владата прогласи кризна состојба во Дебар и Центар Жупа, 4 нови случаи на коронавирус
Предлог до Владата за потребата за учество на дел од Армијата, согласно со Стратегискиот одбранбен преглед дава Управувачкиот комитет. Претседателот во секое време може да ја преоцени потребата од учество на делот од Армијата. Начинот на учество на дел од Армијата во кризна состојба се уредува со пропис кој го донесува претседателот.
Од Армијата на Република Северна Македонија за МИА информираат дека војската е подготвена да одговори на барањата и заклучоците на Управувачкиот комитет каде и да има потреба да биде ангажирана.