За евентуално повторно прогласување вонредна состојба, сега би требало да решава новиот собраниски состав, со 80 гласа, за разлика од пролетта кога одлуките ги носеше претседателот, затоа што парламентот беше распуштен
Премиерот Заев изјави денеска дека одлуките на ВМРО-ДПМНЕ, во однос на веќе завршената вонредна состојба, се неодговорни и несериозни, ама дека не постои опасност од уставна криза, затоа што процесот не е реверзибилен
Очекуваното непотврдување на одлуките на претседателот Стево Пендаровски за прогласување вонредна состојба, во периодот од 18 март до 22 јуни, нема да предизвика уставна криза, според премиерот Зоран Заев.
Коментирајќи ги позициите на ВМРО-ДПМНЕ, која реши да не учествува за обезбедување двотретинско мнозинство за „легитимирање“ на одлуките на шефот на државата, кои беа донесени за справување со ковид-кризата, Заев оцени денеска дека не станува збор за поништување на некои решенија ниту, пак процесот е реверзибилен. Сепак, како што рече, одлуките на опозициската партија се неодговорни и спротивни на интересите на граѓаните.
„Во услови на епидемија на ковид-19, кога доаѓа зима и сезона на грип, несериозно е некој вака да ги поставува работите. Но, секој си ја носи својата одговорност“,
рече Заев.
Доколку ВМРО-ДПМНЕ остане на ставот да не гласа за одлуките на Пендаровски, неговите решенија за вонредната состојба нема да бидат потврдени, затоа што за тоа се потребни најмалку 80 гласа.
Исто толку гласови во парламентот ќе бидат потребни и ако се наметне потреба повторно да се прогласи вонредна состојба.
„Доаѓа зима. Којзнае дали ќе ни треба повторно вонредна состојба. Дали парламентот ќе може да се состанува или не. Ние треба да ги поддржуваме институциите, без разлика дали сме опозиција или власт“,
изјави Заев.
За евентуално повторно прогласување вонредна состојба, сега би требало да решава новиот собраниски состав, за разлика од пролетта кога одлуките ги носеше претседателот Пендаровски, затоа што парламентот беше распуштен и веќе беше формирана техничката влада, која, практично, ја презеде и законодавната власт добивајќи овластување да носи уредби со законска сила.
Но прашање е дали во Собранието ќе можат да се обезбеди двотретинско мнозинство за евентуално повторно прогласување вонредна состојба, со оглед на 44. гласа што ги контролира ВМРО-ДПМНЕ, која засега одбива да ги легитимира и веќе истечените одлуки на претседателот Пендаровски.
Заев посочи денеска дека и претседателот на ВМРО-ДПМНЕ барал прогласување вонредна состојба, иако, како што вели, воопшто не е важно кој го побарал тоа, зашто условите биле такви што тоа морало да се направи.
„Не е важно кој побара прогласување вонредна состојба. Побаравме заедно – власта и опозицијата. Претседателот Пендаровски нѐ послуша, ги слушна аргументите, одржавме состаноци и тој ја прогласи првата вонредна состојба, како и следните. Последната беше на барање на опозицијата заради изборите, немаше начин како поинаку да се организираат роковите за одржување на изборите. Сега да се изјавува дека не се поддржува вонредната состојба, дека нема да се гласа за нејзино потврдување е најблаго кажано неодговорно“,
рече премиерот.
Но, додаде, тоа не значи дека ќе има каква било криза бидејќи, како што потенцира, системот ги има решенијата во себе.
„Процедурите мора да продолжат. Претседателот на парламентот е должен да ги достави одлуките за вонредна состојба до пратениците. Тие треба да расправаат по нив. Не станува збор за уставна криза ниту за некои проблеми за поништување на какви било одлуки кои се донесени ниту, пак, процесот е реверзибилен, односно не може да се врати назад. Не постои ризик“,
истакна Заев.