Шпанија од утре во следните две недели ги затвора училиштата и универзитетите како една од мерките за спречување на ширењето на новиот коронавирус. Тоа го изјави синоќа шпанскиот министер за здравство Салвадор Илја.
Поради тоа во своите домови ќе останат околу 1,2 милиони ученици и студенти.
Истата мерка беше донесена и од властите на баскискиот регион.
Во Шпанија досега, 28 лица починаа како последица од коронавирусот, а 1 204 се инфицирани.
Цела Италија во карантин
Сепак, најрадикални мерки досега презеде Италија, каде од вчера е прогласен карантин на ниво на целата држава.
„Се забранува движење на жителите, освен ако станува збор за ‘докажани професионални обврски’ или за ‘сериозни семејни и здравствени потреби’“,
пишува во владината одлука.
На над 60 милиони жители на Италија, движењето ќе им биде ограничено, доколку не се утврди дека имаат неопходна потреба за тоа.
„Секој оној што ќе сака да се движи ќе треба да има добра причина за тоа. Немаме повеќе време. Потребни се радикални и тешки мерки“
изјави синоќа премирот Конте.
Досега во Италија како последица на коронавирусот починаа 463 лица, односно уште 97 за едно деноноќие. И бројот на заразени се зголеми за 1 797 за 24 часа, така што вкупно 9 172 лица се заразени во земјата, изјави италијанскиот комесар за здравство Анџело Борели.
Според тие податоци, 333 луѓе починале само во регионот Ломбардија, а заразени се 5 469.
Во болниците има 2 820 лица, од кои 440 се на интензивна нега. Борели рече дека 724 лица оздравеле во меѓувреме, пренесува АНСА.
Премиерот Конте оцени дека Италија го преживува својот најмрачен момент, но изрази увереност дека доколку се почитуваат правилата земјата ќе ја надмине ситуацијата.
Претседателот на Светската здравствена организација (СЗО) Тедрос Аданом Гебрејесус вчера изјави дека заканата за пандемија е „многу реална“.