Италијанскиот премиер Џузепе Конте одлучи да ги засили мерките против ширењето на коронавирусот и прогласи карантин на ниво на целата држава.
„Се забранува движење на жителите, освен ако станува збор за ‘докажани професионални обврски’ или за ‘сериозни семејни и здравствени потреби’“,
пишува во владината одлука.
На над 60 милиони жители на Италија, движењето ќе им биде ограничено, доколку не се утврди дека имаат неопходна потреба за тоа.
„Секој оној што ќе сака да се движи ќе треба да има добра причина за тоа. Немаме повеќе време. Потребни се радикални и тешки мерки“
изјави премирот Конте.
Досега во Италија како последица на коронавирусот починаа 463 лица, односно уште 97 за едно деноноќие. И бројот на заразени се зголеми за 1 797 за 24 часа, така што вкупно 9 172 лица се заразени во земјата, изјави италијанскиот комесар за здравство Анџело Борели.
Според тие податоци, 333 луѓе починале само во регионот Ломбардија, а заразени се 5 469.
Во болниците има 2 820 лица, од кои 440 се на интензивна нега. Борели рече дека 724 лица оздравеле во меѓувреме, пренесува АНСА.
Премиерот Конте оцени дека Италија го преживува својот најмрачен момент, но изрази увереност дека доколку се почитуваат правилата земјата ќе ја надмине ситуацијата.
„Ова е нашиот најмрачен час, но ќе го надминеме“,
изјави Конте за италијанскиот весник „Република“.
Тој ги повика сите региони ефикасно да ги спроведуваат мерките на Владата.
Според најновите податоци, во светот досега се регистрирани 111 758 луѓе заразени со новиот коронавирус. Од нив починале 3 891 лице, а 62 679 оздравеле.
Претседателот на Светската здравствена организација (СЗО) Тедрос Аданом Гебрејесус денеска потенцираше дека заканата за пандемија е „многу реална“.
„Заканата е реална. Но тоа би била прва пандемија во историјата која би можеле да ја контролираме. Мора да запомниме дека со секоја правовремена одлука можеме да го забавиме коронавирусот и да спречиме нови зарази. Меѓу оние кои се заразени, повеќето ќе оздрават“,
вели претседателот на СЗО.
Во Кина веќе 70 отсто од заболените оздравеа, појасни Гебрејесус, истакнувајќи дека дури 93 отсто од сите случаи на зараза се забележани во само четири држави. Тој додаде дека се потребни до шест седмици за лице да се опорави од коронавирус, додека кај потешките случаи тој период може да биде и неколку месеци.