Кинескиот град Нанчанг до Скопје испрати донација од 50 илјади заштитни маски. Но, и оваа донација не помина без реакции и преписки за тоа кој точно ја побарал и спровел во земјава, дали поранешниот градоначалник на Скопје, Коце Трајановски или актуелниот, Петре Шилегов.
Трајановски, утринава информираше дека на негово барање, збратимениот кинески град Нанчинг, брзо реагирал и испратил донација.
„Сакам да се заблагодарам на градоначалникот на збратимениот кинески град Нанчанг за брзата реакција на моето барање и за донацијата од 50.000 заштитни маски. Во овие тешки моменти оваа донација е многу значајна за жителите на Скопје. Пријателите се препознаваат во вакви моменти. Се надевам дека амбасадата на Република Македонија во НР Кина ќе стори се донацијата брзо да дојде во Скопје со што ќе допринесе за намалување на последиците од коронавирусот“,
напиша Трајановски на Фејсбук.
Од Град Скопје пак, велат дека тие официјално со допис се обратиле до збратимениот град Нанчанг и имале интензивна комуникација како со градот така и со кинеската амбасада во нашата држава.
„Не знаеме дали господинот Коце Трајановски ургирал до збратимениот град Нанчинг во НР Кина за добивање на заштитни маски, но ако навистина е така, Град Скопје ја поздравува неговата ангажираност. Ова не е време за политика и фалење, туку е време за човечка помош во овие критични моменти. Град Скопје во меѓувреме го организира и транспортот на донираната опрема, со цел истата што е можно побргу да стаса во нашиот град и биде од помош за надлежните градски и државни институции“,
реагираа од Град Скопје.
Нанчанг и Скопје веќе 35 години се збратимени градови, а во 2015 година со неколку свечености се одбележа и 30-годишниот јубилеј.