Испловувањето на бродовите со жито од украинските пристаништа следува откако Москва доби писмени гаранции од Украина оти нема да ги користи хуманитарните коридори и пристаништа за воени операции против Русија, а со тоа дека ќе го врати учеството во договорот за извоз на жито постигнат со посредство на Турција и Обединетите нации (ОН)
Шест брода со жито денеска ги напуштија украинските пристаништа, еден ден откако Русија повторно се приклучи кон договорот за извоз на жито преку Црното Море.
„По продолжувањето на иницијативата за жито, шест брода ги напуштија украинските пристаништа“,
изјави министерот за одбрана Хулуси Акар, цитиран од новинската агенција Анадолија.
Русија на 29 октомври соопшти дека привремено се повлекува од договорот за извоз на жито, а за тој потег кажа дека следува откако украинските сили ги нападнале бродовите на Крим, кој е окупиран од Русија. Руските власти посочија дека некои од нападнатите бродови се цивилни бродови вклучени во обезбедувањето на „коридорот за жито“ за да се овозможи извоз од три украински пристаништа на Црното Море.
Руското министерство за одбрана во вчера соопшти дека Москва добила писмени гаранции од Украина оти нема да ги користи хуманитарните коридори и пристаништа за воени операции против Русија, а со тоа дека ќе го врати учеството во договорот постигнат со посредство на Турција и Обединетите нации (ОН).
Рускиот претседател Владимир Путин вчера изјави дека Москва го задржува правото повторно да се повлече од договорот за испорака на жито со посредство на Турција, но иако го стори тоа, извозот на жито од Украина до Турција не би бил попречен.