Министерката за одбрана Радмила Шекеринска вчера попладне преку телеконференциска врска учествуваше на состанокот на министрите на НАТО, прв што се организира на ваков начин, но и прв на кој таа учествува како министер од Македонија како полноправна членка на Алијансата.
Тема на состанокот, како што рече Шекеринска, е онаа која го окупира и мачи целиот свет, а тоа е пандемијата од ковид-19.
„Се разговараше за тоа како земјите членки се справуваат со пандемијата и на кој начин НАТО помага, како да си помогнеме едни на други во кризата која ќе има политички и економски импликации, при што е заклучено дека не треба да се дозволи да премине во безбедносна“,
рече Шекеринска на прес конференцијата.
Таа рече дека изразила благодарност до земјите сојузнички САД, Турција, Чешка, Унгарија, Словенија, Норвешка, Холандија, Велика Британија и Бугарија за помошта што ни ја испратија, а Македонија како свој придонес во борбата со пандемијата ги понудила медицинските капацитети за соработка со КФОР кои и досега ја добиваа целата логистичка поддршка од нашата земја.
Шекеринска рече дека од споделените искуства, заклучокот е дека нашата армија во справувањето со пандемијата има исти задачи како и другите сојузнички армии – контрола на границите, поставување и чување на контролните точки за влез и излез од одредени градови и општини, обезбедување на критичните точки и виталните објекти, полски болници и ставање на располагање на воените медицински капацитет на цивилните, специјални тимови за биолошка и хемиска одбрана за дезизнфекција, инженерски градежни услуги, достава на пакети со храна за социјално ранливи категории и поддршка на локалните власти и МВР.
„Искуството што го собра нашата земја како партнер во НАТО е клучно во првите моменти од кризата“,
рече Шекеринска најавувајќи дека припадниците на армијата ќе бидат поддршка на повеќе општини каде тоа е побарано, како Скопје, Тетово, Гостивар, Струга, Охрид, Струмица, Куманово, Битола, Прилеп, Велес, Центар Кавадарци и Росоман.
Таа апелираше до граѓаните во деновите што претходат на празникот и во деновите на празникот кога во сила ќе биде забраната на движење да се почитуваат мерките бидејќи, како што рече, иако податоците се позитивни, со неодговорност состојбата може да се врати на самиот почеток.