Изјавата на началникот на Националната полициска агенција доаѓа откако неговата агенција објави извештај за тоа како не успеала да му го спаси животот на експремиерот Абе кога тој беше застрелан. Според експертите што ја погледнале снимката на убиството на Абе, безбедносните мерки преземени во Нара на денот на пукањето се сметаат за недоволни
Началникот на јапонската Национална полициска агенција Итару Накамура денеска изјави дека ќе поднесе оставка за да ја преземе одговорноста за убиството на поранешниот премиер Шинзо Абе, кој беше застрелан додека држеше говор на предизборен митинг во градот Нара на 8 јули годинава, пишува Ројтерс.
Изјавата на началникот на Националната полициска агенција доаѓа откако неговата агенција објави извештај за тоа како не успеала да му го спаси животот на експремиерот Абе кога тој беше застрелан.
„Имаше недостатоци во плановите за безбедност и процените на ризикот на кои тие се засноваа, а насоките од теренскиот командант беа недоволни. Коренот на овој проблем лежи во ограничувањата на сегашниот систем, кој постои со години, во кој локалната полиција сноси единствена одговорност за безбедноста“,
истакна Итару додавајќи дека за да се одбележи нов почеток со нов безбедносен план потребно е да се изгради нова организација.
Според експертите, безбедноста во Нара на денот на пукањето се смета за недоволна.
Телохранителите можеле да го спасат Абе така што ќе го заштитат или да го извлечат од линијата на огнот за 2,5 секунди помеѓу првиот истрел и вториот кој беше фатален, изјавиле за Ројтерс осум безбедносни експерти кои ја прегледале снимката.
Јапонските власти, вклучително и премиерот Фумио Кишида, ги признаа пропустите во безбедноста околу појавувањето на Абе на настанот за изборната кампања, а Националната полициска агенција претходно изјави дека убиството било резултат на тоа што полицијата не ја исполнила својата одговорност.
Минатиот месец јапонските медиуми објавија дека осомничениот атентатор, уапсен на местото на настанот моменти по пукањето, е подложен на психијатриска евалуација.