Министерката за труд и социјална политика Јагода Шахпаска вели дека се работи на законот за пензионирање на 64 години, но на законско решение за предвремено пензионирање со докуп на стаж во моментов не се работи.
Законот за задолжително пензионирање со возраст од 64 години и 15 години стаж ќе ги вклучува сите вработени во јавниот сектор, а ќе остава можности за исклучок во реалниот сектор каде работникот и работодавецот со заемен интерес ќе се договорат за продолжување на работниот век. Примери за исклучоци би биле здравствените работници и наставниот кадар.
„Сакаме државата да функционира, оттука исклучоци ќе се прават само во оние сектори каде, говорам пред сè за здравствените работници, не би сакале да го доведеме во прашање пружањето на квалитетна здравствена заштита на сите граѓани. Исто така се размислува и во делот на наставен кадар во високообразовните институции“,
рече Шахпаска.
Меѓутоа, за закон за докуп на стаж со што би можело да се оди предвреме во пензија, изјави министерката, во моментов не се работи. Тоа, најави таа, ќе биде предмет на поширока дебата.
„Со влегувањето во Министерството воспоставивме контакти но ова е процес кој бара детална анализа, треба да се направи темелна анализа за тоа кој би изразил желба за да откупи стаж и предвреме да оди во пензија. Под кои услови, какви ќе бидат финансиските импликации … Оттука дебатата за пензионирање ќе биде отворена заедно со сите чинители и никако нема да носиме избрзани одлуки“,
вели министерката.