Шефот на дипломатијата Бујар Османи додаде оти е во постојана комуникација со семејството и оти се очекува денеска да ја напушти Украина низ безбедни коридори
Семејството со новороденчето е извлечено од Харков. Сè уште не се излезени од Украина, но се безбедни, изјави денеска министерот за надворешни работи Бујар Османи образложувајќи дека тоа е долг пат што треба да се помине низ безбедни коридори.
Тој додаде дека е во комуникација со семејството и оти се очекува денеска да ја напушти Украина.
Меѓу другото, Османи додаде дека денеска уште едно семејство од Запорожје со воз ја напушта Украина, како и двајца македонски граѓани кои од Киев со автомобил се приклучени на еден конвој.
„Останатите 15 набљудувачи од специјалната мисија денеска исто така ја напуштија Украина. Така што во моментот имаме само еден од тие вкупно 30 набљудувачи во рамки на специјалната мисија кој е останат во Украина, така што продолжуваме со овие комуникации и со разговори со партнерските земји да ги извлечеме сите безбедно од Украина“,
рече Османи.
Другите граѓани, посочи Османи, ги комуницирале вчера бидејќи денеска обезбедиле еден коридор.
„Меѓутоа, прашањето е што тие не можат да стигнат до местото каде што тргнува тој безбеден коридор поради различни причини – безбедносни причини, немаат ниту гориво за да можат да се движат безбедно низ тој коридор, така што имаме неколку околности коишто ги имаме предвид, меѓутоа комуницираме за да создадеме коридори кои се поблиску до нивното место на наоѓање“,
додаде Османи.