Семејствата на 14-те жртви бараат од обвинителството да ја обнови истрагата за да се откријат вистинските виновници за пожарот во модуларната болница во Тетово
Претставници на семејствата на жртвите од трагедијата во модуларната болница во Тетово, денеска на прес-конференција пред тетовскиот Основен суд, побараа обнова на истрагата бидејќи, како што посочија, постојат сериозни докази за кои сметаат дека Обвинителството ги има отфрлено во досегашната постапка.
Тие воедно истакнаа дека се приклучуваат кон јавното писмо од „Иницијатива Нула“ до државниот јавен обвинител Љупчо Коцевски.
„Целата јавност знае дека постојат сериозни докази за пропусти при изградбата на модуларната болница кои можат да бидат единствени причини за пожарот. Тоа беше потврдено и со германското вештачење – независен и кредибилен доказ кој за жал беше отфрлен од обвинителството. Затоа, драг Љупчо, како наш сограѓанин од Тетово, Вие најдобро ја разбирате болката и гневот на семејствата на жртвите и на целата заедница. Ова не е само правно прашање. Ова е морална обврска – кон тие што ги изгубивме, но и кон сите граѓани што денес живеат со страв дека ова може да се повтори, а никој нема да одговара“,
истакна Агрон Арифи од Иницијативата во име на семејствата на жртвите.
Семејствата на 14-те жртви бараат од обвинителството да ја обнови истрагата за да се откријат вистинските виновници за пожарот во модуларната болница во Тетово.
„Време е некој да преземе одговорност. Време е правдата да излезе од фиока. Како семејства на загинатите, бараме од вас да формирате независен тим кој ќе ги испита сите аспекти на случајот, вклучително и евентуалното одолговлекување на постапката. Да гарантирате дека судската постапка ќе се води без политичко бизнис-влијание. Да обезбедите транспарентност и отчетност во вашата работа, во согласност со законските обврски. Да го земете германското вештачење како клучен доказ во истрагата. Ние нема да молчиме. Ќе продолжиме да зборуваме за нашите најблиски кои ги изгубивме, за вистината, за правдата која е ветена, но никогаш донесена“,
истакна Арифи.
Од 10 часот денеска во Основниот суд Тетово продолжи доказната постапка во рамки на повторното судење за пожарот во модуларната болница, во кое се осомничени двајцата поранешни директори на болницата и Јавната здравствена установа Клиничка болница Тетово како правно лице.