Домаќинствата кои останале без приходи поради коронавирусот или биле дел од неформалната економија, за да добијат минимална помош од државата, треба да аплицираат преку центрите за социјална работа.
Министерството за труд и социјална политика информира дека со Уредба со законска сила за примена на Законот за социјалната заштита за време на вонредна состојба, овозможен е брз пристап во системот на социјална заштита.
„За добивање минимална гарантирана помош, материјалната необезбеденост ќе се утврдува врз основа на вкупната просечна висина на сите приходи на сите членови на домаќинството по сите основи, сметано од последниот месец, наместо досегашните три месеци. Износот на правото зависи од бројноста и структурата на домаќинството и се движи од 4 000 денари за едночлено домаќинство до 10 000 денари за домаќинство сочинето од пет возрасни членови“,
соопшти Министерството за труд и социјална политика.
Домаќинствата кои користат гарантирана минимална помош, ќе добијат и паричен додаток од 1 000 денари за покривање на дел од трошоците за потрошувачка на енергенси во домаќинството за месеците април и мај.