Генералниот секретар на Европската служба за надворешно дејствување вели дека целосно и недвосмислено ја поддржува европската перспектива на Северна Македонија и на регионот и дека очекува пристапните преговори да почнат што е можно поскоро
Северна Македонија испорача резултати. Тоа го потврди и Извештајот на Европската комисија, која ги пофали нашите резултати во реформите, транспарентноста, борбата со корупција, институционалниот развој. Сите тие резултати макотрпно ги обезбедивме, со многу работа и посветеност, истакнала министерката за одбрана, Радмила Шекеринска, на средбата во Брисел се сретна со генералниот секретар на Европската служба за надворешно дејствување, Стефано Санино.
„Северна Македонија и припаѓа на Унијата, а на тој пат можеме да се потпреме на искрени пријатели како Стефано. Заедно заклучивме – Северна Македонија испорача резултати, сега топката е во рацете на Унијата“,
напиша Шекеринска на Фејсбук по средбата со Санино.
Таа, како што информира Министерството за одбрана, порача дека процесот на пристапување не може и не смее да се одолговлекува бесконечно. Тоа е, како што се наведува, единствениот начин да се врати довербата на граѓаните во европските процеси.
Генералниот секретар Санино порача дека Европската служба за надворешно дејствување целосно и недвосмислено ја поддржува европската перспектива на Северна Македонија и на регионот и дека очекува пристапните преговори да започнат што е можно поскоро.