Шекеринска и министрите за одбрана на сојузниците на сесиите на Северноатлантскиот совет ќе разговараат за безбедноста на Алијансата и колективната одбрана, како и за други теми, меѓу кои и геостратегиските предизвици за Алијансата
Министерката за одбрана Радмила Шекеринска денеска и утре во седиштето на Алијансата во Брисел ќе учествува на состаноците на Северноатлантскиот совет на НАТО, организирани со физичко присуство, првпат по членството на Северна Македонија во Алијансата.
Шекеринска и министрите за одбрана на сојузниците на сесиите на Северноатлантскиот совет ќе донесат одлуки кои ќе ја зацврстат безбедноста на Алијансата и колективната одбрана, а ќе разговараат и на повеќе теми, меѓу кои и геостратегиските предизвици за Алијансата, состојбата во Авганистан и соработката со ЕУ и партнерите со кои Алијансата и земјите членки споделуваат заеднички вредности, соопшти МО.
Во Брисел, Шекеринска ќе има средба и со директорот на Европската служба за надворешно дејствување, Стефано Санино.
Делегација од Министерството за одбрана, во седиштето на НАТО ќе се сретне и со претставници од агенциите за набавки на НАТО, каде што ќе стане збор за воспоставување на директна, постојана и ефикасна комуникација на Центарот за поддршка на компании во Министерството и двете агенции на НАТО со цел поголема ефикасност во поддршката на домашните компании за учество во набавките на НАТО.