Пред девет години тогашното мнозинство на ВМРО-ДПМНЕ во Градот Скопје ја прекрсти оваа улица, на која живееше и тогашниот премиер Груевски, во „Павел Шатев“
Централното седиште на владејачкиот СДСМ се враќа на старата адреса, односно на „Бихаќска“, која е една од улиците што се најдоа на новата листа на имиња, која синоќа ја усвои Советот на Град Скопје.
Од градоначалникот на Скопје, Петре Шилегов, не добивме одговор дали ова значи дефинитивно враќање на старото име на улицата каде што се наоѓа седиштето на неговата партија.
Оваа улица веќе безмалку една деценија се вика „Павел Шатев“, според еден од солунските атентатори, кој, како социјалист, се смета и за еден од основачите на ВМРО (Обединета). По Шатев, во 2012 година беше именувана улицата на која се наоѓа централата на СДСМ, а каде што живееше и тогашниот премиер Никола Груевски. Истата година, тогаш владејачката ВМРО-ДПМНЕ, која го имаше и мнозинството во Советот на Град Скопје, формираше и партиски институт „Павел Шатев“, кој главно пласираше резултати од анкети.
Листата на имиња на улици што ја усвои сегашниот состав на градскиот совет, во кој мнозинството го имаат СДСМ и ДУИ, предвидува и враќање на старите имиња на дел од скопските улици што беа сменети во периодот кога мнозинството во градскиот Совет и градоначалничкото место во главниот град и во повеќето општини ги имаше ВМРО-ДПМНЕ. Тогаш, преименувањето на улиците, а посебно „бришењето“ на имиња на херои од НОВ и ставање на имиња од периодот на антиката предизвика силни реакции во јавноста.
Во новиот список на имиња на улици има и политичари од периодот на независноста на земјава. Така предвидено е една улица во главниот град да се именува според поранешниот претседател на парламентот, Љупчо Јордановски. Тој беше на чело на Собранието во периодот 2003-2006 година, кога беше испратен за амбасадор во Вашингтон, а по загинувањето на Борис Трајковски беше в.д. претседател на државата, до изборот на Бранко Црвенковски на таа функција. Јордановски почина во 2010 година – на 57 години.
Една улица во Скопје би можела да се вика и според Лазар Колишевски, учесник во НОВ и делегат на заседанијата на АСНОМ.
На списокот, меѓу другите, е и името на познатиот косовски политичар Ибрахим Ругова.
Пред вчерашната седница на градскиот совет, советничката група на ВМРО-ДПМНЕ побара предлог-листата да се симне од дневен ред и за преименувањето на улиците да се отвори јавна расправа.