Сè уште се бараат лицата вработени во наши институции кои се јавувале во Бугарија да лобираат за прекин на преговорите

Треба да ги идентификуваме и да провериме дали некој го кажал тоа. Не можеме некого да земеме на душа, рече денеска министерот Османи, кој пред две недели на брифинг со новинарите го откри случајот

Сè уште се бараат лицата вработени во институциите кои се јавувале во Бугарија за да лобираат да не се продолжи со ангажманот за решавање на спорот меѓу С Македонија и Бугарија, нешто што го обелодени министерот за надворешни работи Бујар Османи на брифингот пред две недели.

Денеска на брифингот Османи рече дека оваа информација ја добиле од Бугарија и сè уште не знаат кои се.

„Од Бугарија ја добивме таа информација дека се јавувале и не знаеме кои се. Треба да ги идентификуваме и да провериме дали тоа некој кажал, бидејќи ситуацијата е таква, и кој. Не можеме некого да земеме на душа“,

рече Османи одговарајќи на новинарско прашање дали се знаат лицата што ги спомена пред две недели.

(ВИДЕО) Османи: Лица од наши институции се јавувале во Бугарија да спречат решение на спорот со образложение дека ќе има предвремени избори

„Оваа недела од Северна Македонија се јавувале во Република Бугарија кажувајќи дека непотребен е целиот тој ангажман затоа што овде ќе се оди брзо на избори, дека ќе има предвремени и дека нема да може ниту да се постигне одредено решение“,

рече Османи на 3 април.

Тој не откри за кои лица и институции станува збор, но дополни дека овие лица се на иста линија со оние за кои зборуваше Петков, кои, како што рече Османи, сакаат да го држат отворено прашањето и да го држат закочен процесот на ЕУ-интеграција и регионот да биде платформа за нивни цели.