Во 2021 година нема место за национализам и хомофобија, се нагласува во иницијативата за собирање потписи за поддршка на Гарванлиев, наспроти петицијата со која се бара тој да не учествува во музичкиот натпревар
Уште една петиција поврзана со македонскиот претставник на годинешново издание на Евровизија, Васил Гарванлиев, се појави денеска на интернет.
За разлика од петицијата која е покрената со цел да се побара Гарванлиев да не ја претставува С Македонија на музичкиот натпревар, поради тоа што имал бугарски пасош, сега се собираат и потписи за поддршка на пејачот, родум од Струмица, кој повеќе години живее во САД.
И втората петиција е адресирана до Владата на С Македонија.
„Во 2021 нема место за национализам и хомофобија, особено кога станува збор за музиката. Македонија на Евровизија била претставувана од пејачи од различни етникуми и тоа е наша предност. Политизирањето на Евровизија мора да престане од тие што навредуваат и неосновано шират говор на омраза“,
е посочено во воведот на петицијата за поддршка на пејачот.
Реакциите околу бугарски пасош на Гарванлиев ги предизвика едно негово ланско интервју, дадено пред манифестацијата да биде одложена поради пандемијата, а во кое тој кажува дека, покрај македонско, има и бугарско државјанство.
Освен двојното државјанство, револт предизвика и телевизискиот спот во кој, според интерпретации во јавноста, се појавуваат бои со кои се алудира на бугарското знаме, иако во спотот зелената, црвената и белата боја се поставени вертикално, додека на официјалното знаме на Бугарија тие се во хоризонтала.