Поради ковид-19, во најголем дел инаугурацијата ќе биде виртуелна. Ќе се организира и специјално телевизиско шоу чиј домаќин ќе биде актерот Том Хенкс, а во кое ќе настапат неколку музички ѕвезди. Поради немирите во Капитол Хил на 6 јануари, пак, безбедноста во Вашингтон ќе биде на највисоко ново на 20 јануари кога се планира да бидат распоредени 20 000 припадници на националната гарда
На 20 јануари, Џо Бајден ќе ја преземе функцијата од Доналд Трамп и ќе стане 46. претседател на САД. На должност тогаш ќе стапи и првата жена потпретседателка, Камала Харис.
Во пресрет на инаугурацијата почнаа да се објавуваат и детали за церемонијата. Поради пандемијата со ковид-19, инаугурацијата во најголем дел ќе биде виртуелна, како што беше и голем дел од изборната кампања на Бајден и Харис.
Се очекува, свечената заклетва традиционално, Бајден да ја даде на скалите пред зградата на Конгресот, пред тревникот на Националниот парк, настан кој секогаш привлекувал стотици илјади луѓе. Меѓутоа, тоа нема да биде случај и сега. Организаторите уште од претходно предупредија дека ќе има ограничен број на присутни на церемонијата, а и останатите пропратни настани нема да бидат како досега.
„Индипендент“ пишува дека не е планирано традиционалното одржување на најпосетената парада низ авенијата Пенсилванија во чест на новиот претседател и нема да има ниту свеченост или мали прослави на кои присуствуваат гости од списокот А на инаугурацијата.
Наместо тоа, настаните ќе бидат виртуелни, нешто што порано го најави и самиот Бајден велејќи дека постојат голем број виртуелни настани, на кои присуствуваат дури и повеќе луѓе отколку вообичаено.
Организаторите денеска објавија и детали од плановите за 20 јануари наведувајќи дека ќе се организира специјално телевизиско шоу во траење од 90 минути. Домаќин ќе биде познатиот актер Том Хенкс, а свои настапи ќе имаат познати музички ѕвезди: Џон Бон Џови, Џастин Тимберлејк, Деми Ловато и Ант Клемонс.
Шоуто ќе се пренесува во живо на пет телевизиски канали, како и на Јутјуб, Фејсбук, Твитер, Мајкрософт Бинг и други платформи, а продуцентите тврдат дека програмата ќе ги претстави херојството и посветеноста на американскиот народ за негово обединување како нација која треба да закрепне и да се обнови.
Виртуелноста нема да биде единственото по што ќе се разликува оваа инаугурација. Поради немирите во Вашингтон на 6 јануари кога поддржувачите на Доналд Трамп упаднаа во Конгресот, церемонијата ќе се спроведува и на највисоко безбедносно ниво.
„Ројтерс“ објави дека Националната гарда на САД се подготвува да распореди 20 000 припадници во Вашингтон за 20 јануари, што е далеку поголем број од пред четири години за време на заклетвата на Трамп кога имаше 8 000 војници како поддршка за полицијата. Патиштата во близина на Капитол Хил веќе се затвораат, а градоначалничката на Вашингтон, Муриел Боусер, апелираше посетителите да се воздржат од посета на Националниот парк.
Компанијата „Airbub“, која се занимава со изнајмување на сместување, пак, веќе соопшти дека ќе ги откаже и блокира сите резервации за Вашингтон и периферијата за неделата во која ќе се случи инаугурацијата. Од компанијата наведоа и дека ќе ги вратат парите на сите оние кои веќе направиле резервации.