Според владејачката партија, експремиерот имал 91 советник, меѓу кои и сегашниот лидер на ВМРО-ДПМНЕ, за кои се издвојувале по 1,7 милион евра годишно
За 91 советник на експремиерот Никола Груевски годишно се одвојувале над 1,7 милион евра од буџетот, реагираа денеска од СДСМ откако опозициската ВМРО-ДПМНЕ излезе со податоци според кои 23 советници на актуелниот премиер Зоран Заев годишно „тежат“ 246 илјади евра.
Од СДСМ, исто така, посочуваат дека советник на Груевски беше и сегашниот лидер на ВМРО-ДПМНЕ, Христијан Мицкоски.
„ВМРО-ДПМНЕ во очај конструира непостоечки случаи. Никола Груевски со години беше советуван од 91 советник, меѓу кои и неговиот потрчко Христијан Мицкоски. Ангажманот на 91 советник на Груевски државата годишно ја чинеше 1,73 милион евра, сума за над седумпати повисока од онаа што денеска ја соопштува ВМРО-ДПМНЕ. Во отсуство на конкретни идеи и проекти, безидејната ВМРО-ДПМНЕ продолжува да конструира непостоечки случаи кои служат единствено за замајување на јавноста.Таков е и последниот случај со советниците на премиерот Заев, позиции што постојат во секој претходен кабинет“,
се наведува во реакцијата на СДСМ.
Според СДСМ, додека го советувал Груевски како да се водат „погубни енергетски политики“, Мицкоски добивал месечен надомест од 1 000 евра или над два милиони денари за целиот ангажман, иако, како што велат од владејачката партија, со месеци лажел дека тоа го правел про-боно.
„Во листата на советници на Груевски, за кои од буџетот се одвојуваат над 1,7 милион евра годишно, покрај Мицкоски се наоѓал и Луке Галевски, актуелниот шеф на Центарот за комуникации на ВМРО-ДПМНЕ, денеска најголемиот извор на лажни вести и конструирани случаи. Додека советниците на Никола Груевски и на Емил Димитриев се криеја од јавноста, владата предводена од СДСМ во континуитет ја унапредува транспарентноста и отченоста пред јавноста“,
одговорија од СДСМ на обвинувањата од ВМРО-ДПМНЕ за советничкиот тим на премиерот.