„Последната несреќа со неисправен автобус на ЈСП само потврдува во каква ужасна состојба е градот и претпријатието, но ВМРО-ДПМНЕ тоа не го засега ни малку“, велат од СДСМ
Вчерашната сообраќајна несреќа кога автобус на Јавното сообраќајно претријатие „Скопје“ удри и се качи на жардиниера на раскрсницата кај Трговскиот центар „Мавровка“ и Универзитетската библиотека „Свети Климент Охридски“ во скопски Центар, денеска е повод Социјалдемократскиот сојуз на Македонија (СДСМ) преку соопштение да реагира за тоа во каква состојба е Градот и Претпријатието.
„Откако ВМРО-ДПМНЕ го презема управувањето со Град Скопје, тој буквално се распаѓа. Нема сегмент во кој не назадува живеењето во главниот град поради пропаднатите бизнис-зделки меѓу Мицкоски и Данела Арсовска. Последната несреќа со неисправен автобус на ЈСП само потврдува во каква ужасна состојба е градот и претпријатието, но ВМРО-ДПМНЕ тоа не го засега ни малку“,
се вели во соопштението од СДСМ.
Според нив, за да биде иронијата уште поголема, во моментов нивната екс-миленичка Данела Арсовска ги обвинува, дека самите советници на ВМРО-ДПМНЕ ја блокираат набавката на нови автобуси за градот.
„Има ли поголем доказ дека користољубието и партискиот интерес на ДПМНЕ се пред се и над се? Воопшто не им е важно дали небезбедни автобуси ќе се возат и дали некој ќе настрада, важно е само дали Мицкоски и ВМРО-ДПМНЕ имаат контрола и интерес во набавката“,
велат од СДСМ.
Во соопштението од СДСМ се додава „како што му тргнало на Мицкоски со виртуелните инвестиции, се надеваме дека ќе најави и нови 250 автобуси кои ќе ги донесе од посетата на САД“.
По вчерашната сообраќајна несреќа еден патник и возачот што управувал со автобусот се пожалиле на повреди.
Денеска возачот на автобусот на прес-конференцијата која се одржа пред управната зграда на ЈСП ,,Скопје“, а на која имаше и претставници на Конфедерацијата на синдикални организации (КСОМ), рече дека сообраќајката е поради техничка неисправност на возилото.
Од КСОМ рекоа дека според сознанија на Синдикатот, за конкретниот автобус неколкупати било пријавувано дека е технички неисправен, но и покрај тоа, бил пуштен во сообраќај, а пред извесен период, како што рече, го користеле на линија до Водно.
Според нив, директен виновник за вчерашната несреќа е градоначалничката на Град Скопје, Данела Арсовска.
Директорот на ЈСП „Скопје“, Драги Кушовски, пак, кој упадна на прес-конференцијата, оцени оти информациите изнесени од страна на Синдикатот се паушални и дека треба да се почека официјалниот извештај на МВР.
Од Град Скопје денеска се огласија преку соопштение, но во него нема наведено никакви објаснувања за вчерашната несереќа со автобусот на ЈСП „Скопје“.
Во соопштението од кабинетот на градоначалничката Данела Арсовска се осврнуваат на тоа што на седницата на Советот на 16 јули 2024 година, по 21 пат е доставена предлог-одлука за нови еколошки автобуси до советниците од ВМРО-ДПМНЕ, кои, како што велат оттаму, повеќе од две години не гласаат за нови автобуси иако имаат мнозинство во Советот на Град Скопје.
„Бидејќи согласно закон градоначалник не може да донесе одлука за набавка на нови автобуси, единствена одговорност по повеќе од две години за недостатокот на автобуси во јавниот превоз имаат советниците од ВМРО-ДПМНЕ, од кои како власт и мнозинство во Град Скопје, зависи дали ќе има нови наместо дотрајани еко автобуси и подобар превоз“,
се вели во соопштението од Град Скопје.