Со денови Христијан Мицкоски, Димитар Апасиев и бројни функционери на ВМРО-ДПМНЕ и Левица ширеа лаги дека државата ќе се бугаризира, дека јазикот и идентитетот се распродадени, смислено и тенденциозно создаваа хистерија во јавноста за да нанесат штета на државните позиции, велат во реакцијата од СДСМ
Денеска сите тешки лаги кои што ВМРО-ДПМНЕ ги пласираше потонаа. Потона уште еден „Титаник“ на ВМРО-ДПМНЕ, заедно со нивниот коалициски проруски партнер Левица, гушнати во деструкцијата и желбата да и наштетат на сопствената држава и на сопствениот народ, реагираа од СДСМ, откако премиерот Димитар Ковачевски во Брисел го одби францускиот предлог во оваа форма.
„Со денови Христијан Мицкоски, Димитар Апасиев и бројни функционери на ВМРО-ДПМНЕ и Левица ширеа лаги дека државата ќе се бугаризира, дека јазикот и идентитетот се распродадени, смислено и тенденциозно создаваа хистерија во јавноста за да нанесат штета на државните позиции. Сите тие смислени лаги за нанесување штета на државата потонаа. Толку ниско се паднати Мицкоски и ВМРО-ДПМНЕ што немаат образ ниту да се извинат. Затоа се опозицијата и ќе останат уште долго во опозиција. Претседателот на СДСМ и на Владата, Димитар Ковачевски покажа државништво, покажа како се брани национален и државен интерес, како се штити националното достоинство на македонскиот народ“,
се вели во соопштението од СДСМ.
ВМРО-ДПМНЕ попладнево на прес-конференција им се заблагодари на интелектуалците, академската заедница, новинарите, колумнистите и сите други општествени чинители кои, како што рече Драган Ковачки, заеднички се спротивставија на предлогот.
Тој во име на ВМРО-ДПМНЕ побара Ковачевски и неговата влада веднаш по враќањето од Брисел имаат обврска да ја депонираат својата оставка до Собранието.