Иако партискиот Статут предвидува и можност за избор на в.д. претседател, за што одлука би се носела на конгрес и би се оневозможило евентуално разгорување на внатрепартиска битка за лидерското место, засега поголема е веројатноста да се оди на нови внатрепартиски избори за лидер, само девет месеци по реизборот на Заев на функцијата
Зоран Заев ја потврдил вечерва намерата за повлекување од партиското кормило пред Извршниот одбор на СДСМ, кој заседаваше пред да почне седницата на Централниот одбор, кој, сепак, е крајна инстанца за официјализирање на оставката. Иако негови блиски соработници од партискиот врв, според информациите и вечерва се обиделе да го премислат, Заев останал на позициите што ги соопшти уште ноќта на 31 октомври.
ТВ 24, повикувајќи се на извори од ИО, јави дека предлогот до ЦО е вонредните избори за нов лидер на партијата да се одржат на 12 декември. Тоа би значело своевидно забрзување на процесот, со оглед на тоа што Статутот на СДСМ предвидува вонредни внатрепартиски избори да се распишат во рок од 15 дена од официјализирањето на оставката, кога би се одредил и датумот за нивно одржување (по правило во недела).
Иако Статутот на СДСМ предвидува и можност за избор на в.д. претседател, за што одлука би се носела на конгрес и би се оневозможило евентуално разгорување на внатрепартиска битка за лидерското место, поголема е веројатноста да се оди на нови внатрепартиски избори за лидер. Со тоа, според проценки во партијата, се отвора простор за влегување на повеќе кандидати во трката, што може да предизвика неизвесност (бидејќи целото членство има право да учествува во изборот на лидер), а наспроти најавите дека сегашното партиско раководство има свој фаворит за наследник на Заев.
Членот на ИО на СДСМ, Мухамед Зекири, пред почетокот на денешните состаноци на раководните тела на партијата, рече дека, ако се отвори постапка за избор на нов лидер, секој од СДСМ кој ги исполнува условите ќе може да се кандидира.
Според Статутот на СДСМ, мандатот на претседател на партијата кој е избран на предвремени избори трае до истекот на мандатниот период во кој е избран.
Заев по третпат беше избран на чело на СДСМ во март годинава, но првпат на непосредни внатрепартиски избори, на кои беше единствен кандидат Според тоа, во период од само девет месеци, социјалдемократите ќе треба по вторпат да излезат на гласање, откако Заев реши да поднесе оставка, по поразот и во вториот круг од локалните избори.
Додека трае седницата на Централниот одбор на СДСМ, Централното претседателство на Алтернатива донесе одлука со која го овласти партискиот претседател Африм Гаши да разговара за влез во Владата со актуелниот премиер Заев и со неговиот евентуален наследник.
Според информациите, во врвот на СДСМ има поделени мислења околу тоа дали, по заминувањето на Заев, треба да се разделат лидерската и премиерската функција. Ставот на Заев, пак, е дека одговорноста треба да ја преземе една личност. Тој изјави неодамна дека, со оглед на искуството од минатото, тој лично смета дека двете функции треба да ги извршува иста личност. Сепак, како што рече, одлуката за тоа ќе ја донесат органите на партијата.