Раководството на Алтернатива го овласти партискиот лидер да почне преговори за приклучување кон владејачката коалиција
Раководството на Алтернатива вечерва го овластило партискиот лидер Африм Гаши да почне преговори со досегашниот лидер на СДСМ и премиер Зоран Заев, како и со неговиот потенцијален наследник, за коалицирање во Владата. Од партијата велат дека на вечерашната седница на Централното претседателство имало различни дискусии, ама дека крајниот заклучок е дека треба да и се даде шанса на стабилноста на државата.
На прашање кои се барањата на Алтернатива за влез во Владата, беше речено дека партијата не се води од апетити за власт, туку дека се залага за баланс во власта, така што некои од партнерите во Владата би требало да се откажат од своите позиции на влијание, за што ќе се дискутира во текот на преговорите.
„Крајниот заклучок е дека земјата е во длабока политичка, здравствена, економска и енергетска криза, чекајќи го датумот за почеток на преговорите со ЕУ. Во тој контекст, дискутиравме за можноста и помошта што може да ја пружиме за откочување на оваа ситуација. По сеопфатна дискусија, генералниот заклучок е дека треба да ѝ дадеме шанса на стабилноста, така што го овластивме претседателот на Алтернатива да разговара со сите политички актери, во случајот со актуелниот и со потенцијални нов премиер. Во преговорите ќе видиме дали некои од партнерите ќе покажат волја да се откажат од дел од својата моќ. Во секој случај, конечната одлука за тоа тоа дали ќе учествуваме во Владата ќе ја донесе Централното претседателство“,
рече портпаролот на Алтернатива, Орхан Мурезани, на прес-конференција по завршувањето на состанокот на раководството на Алтернатива.
Пред точно една седмица, Гаши имаше средба со Заев во Клубот на пратеници, со што беше отворена можноста за повторно влегувасње на Алтернатива во владата на СДСМ, каде што партиципираше и до ланските парламентарни избори.
На средбата, Заев беше придружуван од Димитар Ковачевски, актуелниот заменик-министер за финансии и член на Извршниот одбор на СДСМ, што беше протолкувано како негова промоција за нов лидер на СДСМ.