Во владејачката партија, неофицијално, има размислување дека предлогот за распуштање на Собранието треба да произлезе од сите парламентарни групи, со оглед на консензусот што беше постигнат меѓу партиите 10. парламентарни избори да бидат во вонреден термин
Владејачкиот СДСМ сè уште не излезе со официјален став за предлогот што опозициската ВМРО-ДПМНЕ го достави во парламентот – за негово распуштање на 12 февруари, со цел одржување избори на 12 април.
Пратеникот и портпарол на СДСМ, Костадин Костадинов, досега не одговори на нашето прашање во врска со предлогот што го подготви ВМРО-ДПМНЕ откако лидерот на социјалдемократите Зоран Заев, во неколку изјави, остави отворена можност да се пролонгира распуштањето на парламентот, а со тоа и распишувањето на изборите, за да има време да се донесат законот за јавно обвинителство и уште неколку закони од евроатлантската агенда.
Единствено, пратеникот на СДСМ, Бетиан Китев, изјави вчера дека лично би гласал за распуштање на парламентот на 12 април. Но, како што рече, ако има простор за дополнителни 5-6 дена, за да се донесат измените на Изборниот законик и законот за јавно обвинителство, може да се пролонгира рокот за распуштање на Собранието, а и покрај тоа да се запазат изборните рокови за 12 април.
Спикерот Талат Џафери од поодамна го посочи 12 февруари како оптимален термин за распуштање на парламентот, откако на лидерската средба во октомври минатата година претседателите на парламентарните партии се договорија за избори на 12 април. Деновиве, Џафери изјави дека не е важно кој ќе биде формално поднесувач на барањето за распуштање на парламентот. Рече дека и тој самиот е подготвен да го поднесе предлогот, со цел да се испочитуваат роковите предвидени со Изборниот законик, вклучително со рокот од 100 дена пред изборите за конституирање на преодната влада.
Во пратеничката група на СДСМ, пак, неофицијално, има размислувања дека предлогот за распуштање на парламентот треба да произлезе од сите парламентарни групи, со оглед на консензусот што беше постигнат меѓу партиите десеттите парламентарни избори да бидат во вонреден термин и тоа на 12 април.
Првата поддршка за предлогот на ВМРО-ДПМНЕ за распуштање на парламентот следната среда дојде од сега опозициската Алијанса за Албанците. Пратеникот Сурија Рушити изјави дека договорот да има избори на 12 април треба да се почитува и дека Алијансата ќе поддржи распуштање на парламентот, без разлика на тоа кој ќе ја поднесе иницијативата.
За парламентот да се распушти потребни се 61 глас, што теоретски би можеле да се обезбедат и без најголемата владејачка партија, со оглед на тоа што Заев изјави деновиве дека нема да дозволи пратениците на СДСМ да го стиснат копчето за распуштање без да бидат донесени клучните закони. По распуштањето на Собранието, спикерот Џафери треба да ги распише изборите. Од моментот на распишување на изборите почнуваат да течат роковите за спроведување на изборните дејствија, но и забраните и ограничувањата за државните институции, кои се предвидени со Изборниот законик и со законот за спречување корупција.