„Додека нашите граѓани кои гласаат во татковината минуваат сериозна контрола пред гласање – дури и отпечаток од прст, проверка на документи, потпис во избирачки список, Мицкоски сака да има апсолутна можност за кражба преку гласање на далечина“, реагираат од СДСМ
Мицкоски по насилното укинување на техничката влада, сега сака да воведе систем за масовна кражба на гласови, се вели во денешното соопштение од Социјалдемократскиот сојуз на Македонија (СДСМ).
Од СДСМ велат дека по укинувањето на техничката влада, премиерот Христијан Мицкоски се обидува да наметне „автократски модели“ преку измени во изборното законодавство.
Според СДСМ, целта на најавените измени е да се воведе гласање на далечина за дијаспората, со што, како што тврдат, околу 200 000 гласови би останале без соодветна контрола.
„Додека нашите граѓани кои гласаат во татковината минуваат сериозна контрола пред гласање – дури и отпечаток од прст, проверка на документи, потпис во избирачки список, Мицкоски сака да има апсолутна можност за кражба преку гласање на далечина“,
реагираат од СДСМ.
Од партијата потсетуваат на истрага која, според нивните наводи, била покрената во Америка минатиот декември за кражба на гласови, при што биле инволвирани сервери во сопственост на српска фирма блиска до СНС и претседателот Александар Вучиќ.
„Сите знаеме за односите меѓу Вучиќ и Мицкоски, за нивната ’братска’ врска и сестринските партии. Знаеме за користење на истата бот-платформа и фарми на тролови за влијание на социјалните мрежи“,
се додава во соопштението.
Опозицијата обвинува и за силно унгарско и српско влијание во домашниот простор, тврдејќи дека 40 отсто од медиумите во Македонија се во сопственост на структури поврзани со унгарскиот премиер Виктор Орбан, а во служба на владејачката партија.
„Знаеме и за Латас, кој е главниот човек за медиуми и уредувачка политика во име на Мицкоски. Знаеме и за најновите желби и упорност на Мицкоски да ги протурка дата-центрите во Македонија, иако се на штета на екологијата и со ненормална потрошувачка на струја која може да доведе до проблеми со снабдувањето на домаќинствата. Знаеме и кој се занимава со увоз на струја со својот бизнис-партнер од Србија, почесниот конзул“,
велат од СДСМ.
Според СДСМ, ова се доволни причини за да не треба да поминат измените на Изборниот законик. Тие го обвинија Мицкоски за практикување „целосен авторитаризам“.
„За неговиот лагоден живот и луксуз му е неопходна власта. Само додека е на власт може да оди и на море, без да го болат колената“,
додаваат од СДСМ.
Лидерот на опозицискиот Социјалдемократски сојуз на Македонија (СДСМ), Венко Филипче, вчера на прес-конференција изјави дека измените на Изборниот законик како што се сега предложени, не се ниту европски ниту демократски, особено осврнувајќи се на делот кој предвидува дијаспората да може да гласа по електронски пат, почнувајќи од следните претседателски избори што треба да се одржат во 2029 година.