„Мицкоски да каже кој е неговиот план, да го каже својот став и да ја каже алтернативата бидејќи нема разлика помеѓу европската агенда и македонската агенда за евроатлантска интеграција“, побараа од СДСМ
Македонската агенда е европска и европската агенда е и македонска агенда, а единствен што ги става во конфликт е Христијан Мицкоски, реагираат од владејачкиот СДСМ.
„Првпат по 32 години независност, кога граѓаните се определија државата да стане дел од НАТО и дел од ЕУ, еден политичар вели дека европската агенда не е иста со македонската агенда, што значи дека тој има некаков друг план во однос на интеграцијата на државата. Мицкоски да каже кој е неговиот план, да го каже својот став и да ја каже алтернативата, бидејќи нема разлика помеѓу европската агенда и македонската агенда за евроатлантска интеграција“,
велат од СДСМ.
Од партијата сметаат дека за продолжување на европскиот пат на државата потребно е усвојување на уставните измени, кои се дел од Преговарачката рамка, усогласена меѓу 27 земји членки на ЕУ и прифатена од македонското Собрание од политичари од различни политички партии.
„Предложените уставни амандмани не задираат во ниту едно идентитетско прашање, се работи за техничка измена на Уставот со која, покрај постојните делови од народи кои се вклучени во Преамбулата, се додаваат и делови од други народи кои досега не биле дел од Преамбулата, меѓутоа биле наведени под други“,
велат од партијата.
Додаваат дека со ова се демантираат сите, како што велат, невистини, лаги и хистерија на ВМРО-ДПМНЕ во однос на тоа дека во Македонија ќе се случи бугаризација и асимилација.