За денеска е закажана прес-конференција на ЗЕЛС, на која според најавата ќе се разговара и за проблемите на општините предизвикани од енергетската криза
Градоначалничката на Скопје, Данела Арсовска, секојдневно покажува елементарно непознавање на ингеренциите на градоначалникот и Советот на Град Скопје и не е способна и не може да ги реши проблемите на скопјани па затоа постојано бара оправдување за нејзината неспособност, реагираат од СДСМ во врска со нејзината изјава дека е потребна е стратегија на национално ниво за излез од енергетската криза.
„Таа не предвидела ниту денар за Буџетот за 2022 за справување со енергетската криза и за затоплување на скопјани, а нејзиниот одговор дека не можела да го врати времето назад е грубо потценување на граѓаните на Скопје. Без срам и перде за три пати го намали буџетот за животна средина, неколкукратно го намали буџетот за субвенционирање за набавка на инвертори, а сега Арсовска бега од предизвиците што ги носи енергетската криза. За се што е во интерес на граѓаните Арсовска се иззема и вели дека не е надлежна. Тоа нечесен и неодговорен однос кон градот и неговите граѓани“,
се вели во денешното соопштение од владејачката партија.
Од Град Скопје, пак, исто така, преку соопштение одговорија дека Градот ниту може ниту, пак, има какви било ингеренции за креирање и имплементација на енергетски и економски политики кои би ја решиле оваа криза од која најголемите штети ги трпат токму граѓаните и тврдењата на СДСМ ги нарекуваат небулозни.
„Надлежностите се јасни и токму Владата предводена од СДСМ е таа која треба да преземе одговорност на национално ниво и покаже вистинска грижа за граѓаните, преку носење на сет од мерки за намалување на економскиот и енергетски шок со кој се соочуваме сите. Во време на најави за енергетска и економска криза уште месеци наназад, додека земјите од регионот, но и цела Европа креираат политики за брзо надминување на енергетската криза без притоа да има удар врз џебот на граѓаните, СДСМ креираше политики како секојдневно да манипулира со јавноста, упорно посочувајќи го градот и оваа градска власт како виновник за нивните поразителни политики“,
се вели во соопштението од Град Скопје.
Оттаму велат дека Градот во оваа ситуација може да помогне со давање на предлог мерки за надминување на енергетската криза, односно како што е во европските земји.
Арсовска во вечерашното гостување во дебатната емисија „Топ тема“ на телевизија Телма рече дека да можел градот да креира енергетски и економски политики, ќе ги креирал и изготвел до сега и дека она кое е отпочнато во преземање на дел од ингеренциите на Градскиот енергетски систем како претпријатие за жал не успеа да добие лиценца од страна на Регулаторната комисија за енергетика и истото е сега во овој момент во спор.
„Се надеваме по разрешувањето на оваа состојба ќе има конкретно решение и таа лиценца ќе биде добиена, меѓутоа, до тој момент градот, како и останатите општини немаат никакви ингеренции над она што се случува“,
изјави градоначалничката на Град Скопје.
За денеска е закажана прес-конференција на ЗЕЛС, на која според најавата ќе се разговара и за проблемите на општините предизвикани од енергетската криза.