СДСМ смета дека не треба да има државна матура оваа учебна година, информира генералниот секретар на партијата, Љупчо Николовски.
Посочувајќи ја состојбата со коронавирусот која го промени текот на образовниот процес, Николовски рече дека матурантите треба да бидат ослободени од оваа обврска, а доколку на факултетите има голема конкуренција за упис да се организира приемен испит.
„На овој начин ќе ги поддржиме учениците, матурантите, имајќи ги предвид специфичните услови во кои се одвива образовниот процес и водејќи грижа за нивното здравје. Сметаме дека ова е најисправната одлука, имајќи ги предвид сите аспекти на кризата од коронавирусот за која очекуваме да се произнесат и надлежните институции“,
посочи Николвски.
Укинување на матурата денеска уште еднаш побара и ВМРО-ДПМНЕ, обвинувајќи дека професорите и учениците се оставени сами на себе да се снаоѓаат со наставата во вонредни околности.
Министерот за образование, пак, смета дека онлајн-наставата засега се одвива успешно. На една од последните прес-конференции, Арбер Адеми порача дека сите опции се на маса и дека е можно или одложување или укинување на државната матура за оваа учебна година.