Според информациите од граѓаните во Неготино и околината, ситуацијата во Неготинско со пожарите е алармантна, велат од опозицискиот СДСМ и бараат прогласување вонредна состојба.
„Во моментов беснее пожар кој се заканува на населено место, викенд населбата Калањево. Граѓаните информираат дека нема доволна механизација, ниту навремена реакција од надлежните. Додека целиот државен врв е надвор од земјата, прашуваме каде е Силјановска да реагира на кризата? Дали воопшто се издадени потребните наредби за ангажирање на сите расположливи ресурси за гаснење на пожарите? Состојбата се влошува од ден во ден, државниот врв да се разбуди и да менаџира. СДСМ смета дека е потребно прогласување на вонредна состојба на регионот Неготино и итна консолидација и реакција на сите институции. Доколку е потребно итно да се обезбеди поддршка од соседните земји“,
велат од СДСМ.
Вечерва Центарот за управување со кризи информираше дека се активни вкупно осум пожари на отворено меѓу кои и пожарот на планината Серта, во атарот на селото Калањево.
Од АМСМ вечерва информираа дека од 21:10 часот сообраќајот на регионалниот пат Штип – Неготино кај клучка 21км е во прекин во двата правци поради пожарот на планината Серта.